Ukrayna Rusiyanın Krasnodar diyarında yerləşən “Tamannefteqaz” neft-qaz terminalına və Volqoqrad vilayətindəki neft nasos stansiyasına zərbələr endirib.

Ukrayna Təhlükəsizlik Xidmətinin (SBU) yaydığı məlumata görə, əməliyyat xüsusi bölmələrin – “Alfa” Xüsusi Əməliyyatlar Mərkəzinin, Ukraynanın Xüsusi Əməliyyatlar Qüvvələrinin və Baş Kəşfiyyat İdarəsinin koordinasiyalı fəaliyyəti nəticəsində həyata keçirilib.

Məlumatda qeyd olunur ki, “Tamannefteqaz” Rusiyanın cənubunda maye karbohidrogenlərin daşınması və yüklənməsi üzrə ən iri terminallardan biridir. Bildirilir ki, PUA zərbələri nəticəsində rezervuar parkında yerləşən bir neçə çən və yükləmə estakadaları hədəfə alınıb.

Ukrayna tərəfi əməliyyatın nəticəsində obyektin fəaliyyətinə ciddi ziyan dəydiyini iddia etsə də, dəymiş zərərin miqyası barədə dəqiq məlumat açıqlanmayıb.

Eyni zamanda Volqoqrad vilayətində Kotovo yaşayış məntəqəsi yaxınlığında yerləşən neft nasos stansiyasının da hədəfə alındığı bildirilir. Ukrayna hərbi rəhbərliyi həmin stansiyanın Rusiyanın neft nəqli və ixrac infrastrukturunda mühüm rol oynadığını qeyd edib.

Son aylarda Ukrayna Rusiyanın enerji və logistika obyektlərinə qarşı pilotsuz uçuş aparatları ilə hücumları intensivləşdirib. Rusiya isə əksər hallarda hücumların qarşısının alındığını və infrastrukturun nəzarətdə saxlandığını bildirir.

Məlumatların müstəqil mənbələr tərəfindən tam təsdiqi hələlik mümkün olmayıb.