Türkiyədə hakimiyyətin siyasətini və Prezident Rəcəb Tayyib Ərdoğanı sərt tənqid etməsi ilə tanınan ilahiyyatçı, Furkan Vəqfinin qurucusu Alparslan Kuytul saxlanılıb.

Avqustun 19-da səhər saatlarında Adanada Kuytulun yaşadığı evə polis qüvvələri tərəfindən əməliyyat keçirilib. Əməliyyat zamanı Alparslan Kuytulla yanaşı, həyat yoldaşı Semra Kuytul da saxlanılıb. Adana mərkəzli əməliyyatın ümumilikdə 6 vilayətdə 49 ünvanda aparıldığı və 32 nəfər barəsində hüquqi prosedur başladıldığı bildirilir.

Diqqətçəkən məqam əməliyyatın Kuytulun hakimiyyətin son addımlarını açıq şəkildə tənqid etməsindən dərhal sonra keçirilməsidir. Kuytul Süleymancılar icmasına qarşı keçirilən əməliyyatı tənqid etmişdi. Bundan sonra Prezident Ərdoğanın baş müşaviri Oktay Saral sosial mediada Kuytula ünvanlanan “növbə sənə də gələcək” məzmunlu xəbərdarlıq etmişdi. Bir gün sonra isə Kuytulun evinə polis basqını olub.

Alparslan Kuytul uzun illərdir Türkiyə hakimiyyətinin siyasətini açıq şəkildə tənqid edən dini fiqurlardan biri kimi tanınır. O, bundan əvvəl də çıxışlarına və siyasi mövqeyinə görə təzyiqlərlə üzləşdiyini bildirib. Kuytul əvvəlki məhkəmə proseslərindən birində də siyasi mövzularda danışdığı üçün hədəfə çevrildiyini söyləmişdi.

Rəsmi məlumata görə, hazırkı istintaq “cinayət təşkilatı yaratmaq” və digər cinayət əməlləri ilə bağlı aparılır. Kuytul və tərəfdarları ilə bağlı hüquqi prosedur davam edir.

Hadisənin Kuytula ünvanlanan açıq xəbərdarlıqdan cəmi bir gün sonra baş verməsi isə onun saxlanılmasının siyasi motivləri ilə bağlı müzakirələri yenidən gündəmə gətirib.