Bakı Ağır Cinayətlər Məhkəməsində Azərbaycanın konstitusiya quruluşunu zorla dəyişdirməyə cəhd və digər ağır cinayətlərdə ittiham olunan 13 nəfərə hökm oxunub. Onlar “Qisas qrupu”nun üzvləri kimi təqdim olunurlar və “Kərimə dövləti” yaratmaq niyyətində ittiham edilirlər.

Məhkəmənin hökmünə əsasən:
• Faiq Zeynalov – 17 il
• İlham Şıxaliyev – 17 il
• Hüseyn Hüseynzadə – 16 il
• Etibar Məmmədzadə – 16 il
• İlkin Bağırov – 16 il
• Vüqar Mədətov – 16 il
• Elgün Ağayev – 16 il
• Elvin Cəfərov – 15 il 6 ay
• Yusif Mirzəyev – 15 il 6 ay
• Ruslan Əliyev – 15 il 6 ay
• Savalan Hüseynli – 15 il 6 ay
• Məhərrəməli Musayev – 15 il 6 ay
• Mir Vasid Əliyev – 10 il azadlıqdan məhrum edilib.

İttihamlar və əməliyyatın təfərrüatları

Təqsirləndirilən şəxslər 2023-cü ildə Dövlət Təhlükəsizliyi Xidməti (DTX) və Daxili İşlər Nazirliyinin birgə əməliyyat-istintaq tədbirləri nəticəsində saxlanılıblar. Onlara qarşı Azərbaycan Respublikası Cinayət Məcəlləsinin bir sıra ağır maddələri ilə ittiham irəli sürülüb:
• 170.3 – yetkinlik yaşına çatmayanı cinayətkar qrupa cəlb etmə
• 234.1-1 – narkotiklə bağlı maddə
• 274 – dövlətə xəyanət
• 277 – dövlət və ictimai xadimə sui-qəsd
• 278.2 – konstitusiya quruluşunu zorla dəyişdirmə
• 28 – cinayətə hazırlıq və s.

“Kərimə dövləti” planı və təlimatlar

İstintaq materiallarına əsasən, İranda yaşayan və bu ölkənin xüsusi xidmət orqanları ilə əməkdaşlıq etdiyi iddia edilən Ruhulla Axundzadə və oğlu Əlmürsəl Axundzadə, Azərbaycanda “Kərimə dövləti” yaratmaq məqsədilə bir sıra şəxsləri gizli qruplar vasitəsilə cəlb ediblər. “WhatsApp” və “Telegram” üzərindən aparılan yazışmalarda iştirakçılara müxtəlif tapşırıqlar verildiyi bildirilib.

İddialara görə, həmin tapşırıqlara sabiq təhsil naziri Misir Mərdanov və jurnalist Mirşahin Ağayevin izlənməsi, onlara qarşı sui-qəsdə hazırlıq, hərbi obyektlərin görüntülərinin çəkilməsi və gizli məlumatların toplanması daxil olub.

Misir Mərdanovun hədəf seçilməsi məktəblərdə hicabın qadağan olunması ilə əlaqələndirilib. Mirşahin Ağayevin isə dini liderləri təhqir etdiyi iddiası ilə hədəfə alındığı bildirilir. Hər iki şəxs zərərçəkmiş qismində tanınıb və istintaqa ifadə veriblər. Onlar sui-qəsd planlarından xəbərsiz olduqlarını bildiriblər.