İsrail və İran arasında davam edən silahlı qarşıdurmaya Misirin nüfuzlu dini qurumu Əl-Əzhər də qoşuldu. Əl-Əzhərin şeyxi Əhməd ət-Tayyibin sərt bəyanatı ilə İsrailin İrana qarşı hərbi əməliyyatları qınanıb və beynəlxalq ictimaiyyətin susqunluğu kəskin tənqid edilib. Şeyx ət-Tayyib bu susqunluğu “cinayətə şəriklik” adlandıraraq, müharibənin heç vaxt sülh gətirməyəcəyini vurğulayıb.

Bu, Əl-Əzhərin rəhbərinin İsrail-İran münaqişəsinə ilk açıq və birbaşa müdaxiləsi kimi qiymətləndirilir. Müşahidəçilər bəyanatın vaxtlamasına və məzmununa diqqət çəkərək, onun təsadüfi olmadığını bildirirlər. Qahirədəki siyasi analitiklərə görə, bu çıxış Misir rəhbərliyinin İsrailə qarşı artan diplomatik təzyiqləri ilə uzlaşır və Əl-Əzhərin bu mövqeyi rəsmi xəttin davamı kimi görünür.

Maraqlıdır ki, bəyanat Misirin İranla münasibətlərini genişləndirməyə başladığı bir dönəmə təsadüf edir. Müharibədən az əvvəl İran xarici işlər nazirinin müavini Abbas Əraqçinin Qahirədə yüksək səviyyəli görüşlər keçirməsi, iki ölkə arasında siyasi yaxınlaşmanın siqnalı kimi qiymətləndirilir.

Əl-Əzhərin bu addımı eyni zamanda İsrailin münaqişəni “ərəb dünyası adından” apardığını iddia edən ritorikasına qarşı yönəlmiş ciddi etirazdır. Şeyx ət-Tayyibin bəyanatı, sünni və şiə məzhəbləri arasında yaxınlaşmanı təşviq edən mesajlarla zəngindir və bölgədə məzhəb fərqlərinin ikinci plana keçdiyi yeni dini-siyasi reallığın formalaşmasından xəbər verir.

Misirli siyasi şərhçi Məhəmməd Məhəssin Əbu Nəur bəyanatın rəsmi dövlət mövqeyinə tam uyğun olduğunu bildirib. Onun fikrincə, Əl-Əzhər rəhbərliyi bu bəyanatla Misirin milli maraqlarını qorumaq üçün öz dini nüfuzundan istifadə edir.

Əl-Əzhərin bəyanatı ölkə daxilində də geniş dəstək qazanıb. İsrailə qarşı sərgilənən bu mövqe ictimai rəyin gözləntiləri ilə səsləşir və Qahirə rəhbərliyinin siyasi ritorikası ilə paralellik təşkil edir.

Ekspertlər hesab edir ki, bu bəyanat Misirin İranın bölgədəki çəkindirici güc kimi qalmasına maraqlı olduğunu da göstərir. Qahirə rəsmi olaraq İsrailin bölgədə dominant rol almasını istəmir və İranın zəifləməsinin öz təhlükəsizliyinə təhdid yarada biləcəyini düşünür.

Bütün bu inkişaflar fonunda aydın olur ki, Əl-Əzhərin bu bəyanatı təkcə dini mövqe deyil, həm də siyasi mesaj daşıyır. Misir bu yolla həm öz regional nüfuzunu gücləndirməyə, həm də İsrailin informasiya savaşına qarşı dini təsir gücünü işə salmağa çalışır.