Azərbaycan Respublikasının Prezidenti İlham Əliyev iyulun 7-də Pakistan Milli Assambleyasının sədri Sərdar Ayaz Sadiqin rəhbərlik etdiyi nümayəndə heyətini qəbul edib.

Görüş zamanı dövlət başçısı Azərbaycan ilə Pakistan arasında siyasi münasibətlərin yüksək səviyyədə olduğunu vurğulayaraq, ikitərəfli əlaqələrin qardaşlıq, qarşılıqlı dəstək və həmrəyliyə əsaslandığını bildirib. Prezident İlham Əliyev bir neçə gün əvvəl Xankəndidə Pakistanın Baş naziri Məhəmməd Şahbaz Şərif ilə keçirilən görüşü məmnunluqla xatırladıb və həmin görüşdə ikitərəfli gündəlik üzrə geniş müzakirələrin aparıldığını qeyd edib.

Dövlət başçısı əlavə edib ki, bu, Pakistanın Baş nazirinin azad edilmiş ərazilərə ilk səfəri deyil. Prezident Məhəmməd Şahbaz Şərifin may ayında Laçına səfərini və Azərbaycanın Müstəqillik Günü ilə bağlı tədbirdə iştirakını da xatırladıb.

Görüşdə Prezident İlham Əliyev siyasət, iqtisadiyyat və sərmayələr sahəsində Azərbaycan–Pakistan münasibətlərinin uğurla inkişaf etdiyini, parlamentlərarası əməkdaşlığın bu əlaqələrin genişlənməsində mühüm rol oynadığını qeyd edib. O, beynəlxalq parlament təşkilatlarında hər iki ölkənin nümayəndə heyətlərinin bir-birini dəstəkləməsinin məmnunluq doğurduğunu bildirib.

Qəbula görə təşəkkür edən Pakistan Milli Assambleyasının sədri Sərdar Ayaz Sadiq ölkəmizə səfərdən və Prezidentlə görüşdən şərəf hissi keçirdiklərini bildirib. O, nümayəndə heyətinə həm iqtidar, həm də müxalifət partiyalarının təmsilçilərinin daxil olduğunu vurğulayaraq, bu faktın Pakistan parlamentində Azərbaycana qarşı vahid və həmrəy mövqeyin göstəricisi olduğunu qeyd edib.

Sərdar Ayaz Sadiq həmçinin ölkələr arasında parlamentlərarası əlaqələrin əhəmiyyətini vurğulayaraq, Azərbaycanın hər zaman Pakistanla həm çətin, həm də xoş günlərdə birgə olduğunu qeyd edib. O, İqtisadi Əməkdaşlıq Təşkilatının 17-ci Zirvə görüşünün uğurla keçirilməsi münasibətilə Prezident İlham Əliyevi təbrik edib və bu tədbirin Xankəndidə təşkil olunmasının böyük siyasi əhəmiyyət daşıdığını söyləyib. Qonaq həmçinin Qarabağ və Şərqi Zəngəzurda aparılan bərpa-quruculuq işlərini yüksək qiymətləndirib.

Görüşdə parlamentlərarası əlaqələrin genişləndirilməsi, eləcə də iqtisadiyyat, ticarət, enerji, sənaye, investisiya, nəqliyyat və turizm sahələrində əməkdaşlıq perspektivlərinə dair fikir mübadiləsi aparılıb.