İstanbul Böyükşəhər Bələdiyyə Başqanı, Cümhuriyyət Xalq Partiyasının (CHP) aparıcı simalarından biri olan Əkrəm İmamoğlu iyulun 16-da keçirilən məhkəmə iclasında 1 il 8 ay müddətinə azadlıqdan məhrum edilib.

Məhkəmədə əsas müzakirə obyekti İmamoğlunun İstanbul Baş prokuroru Akın Gürlek haqqında səsləndirdiyi fikirlər olub. İmamoğlu “hədəf göstərmə” ittihamından bəraət qazansa da, “dövlət qulluqçusuna təhqir” maddəsi üzrə 1 il 5 ay, “hədələmə” maddəsi üzrə isə əlavə 2 ay 15 gün həbs cəzası alıb.

Məhkəmənin qərarına əsasən, İmamoğlunun siyasi fəaliyyətinə qadağa qoyulmayıb.

“Türkiyə Cümhuriyyəti tarixində belə bir təcrid yoxdur; susdurulan, danışmağa imkan verilməyən, vəsiqəlik şəklindən belə qorxulan bir Əkrəm İmamoğlu var”, – deyə mer çıxışında bildirib.

Dövlət ittihamçısı daha sərt cəza tələb edərək, İmamoğlunun 7 il 4 ay müddətinə azadlıqdan məhrum edilməsini, dövlət vəzifəsindən uzaqlaşdırılmasını, həmçinin seçmək və seçilmək hüququndan məhrum edilməsini istəmişdi.

Bu cinayət işi İmamoğlunun haqqında irəli sürülmüş ittihamlardan yalnız biridir. Hazırda o, əlavə olaraq üç başqa iş üzrə də təqsirləndirilir. Bu işlərdə İmamoğlu Türkiyə Ali Seçki Qurumu üzvlərini təhqir etməkdə, məhkəmə hakimiyyətinə və dövlət tenderlərinə qanunsuz müdaxilədə ittiham olunur.

Bundan başqa, İmamoğlu “terror təşkilatına yardım” və “cinayət təşkilatı yaradıb idarə etmək” ittihamları ilə də iki ayrı iş üzrə dindirilir.

Əkrəm İmamoğluna verilmiş cəza Türkiyə siyasi arenasında geniş rezonans doğurub və ölkə daxilində olduğu kimi, beynəlxalq ictimaiyyətdə də narahatlıqla qarşılanıb.