Azərbaycan avqustun 2-dən etibarən Suriyaya təbii qaz ixracına start verir. Qaz Türkiyə ərazisindən keçməklə Suriyaya çatdırılacaq. Bu mühüm enerji əməkdaşlığı addımı münasibətilə Türkiyənin Kilis şəhərində rəsmi tədbir təşkil olunacaq.

APA-nın əldə etdiyi məlumata görə, yeni qaz ixracı istiqaməti Azərbaycanla Suriya arasında son dövrlər intensivləşən siyasi və iqtisadi əlaqələrin nəticəsidir. Bu ilin iyul ayında Suriyanın keçid dövrü Prezidenti Əhməd Əl Şaraa Azərbaycana rəsmi səfər edib və burada yüksək səviyyəli görüşlər keçirilib. Bundan əvvəl isə Antalya Diplomatiya Forumu çərçivəsində Prezident İlham Əliyevlə görüş baş tutub.

Görüşlər zamanı Azərbaycan tərəfi Suriyanın münaqişədən sonrakı dövrdə inkişafına və bərpa-quruculuq proseslərinə dəstək göstərməyə hazır olduğunu bəyan edib.

Hazırda Azərbaycan təbii qazını 12 ölkəyə ixrac edir. Suriyanın bu siyahıya əlavə olunması enerji diplomatiyasının coğrafiyasının genişlənməsi baxımından əhəmiyyətli hadisə kimi dəyərləndirilir.