Rusiya hüquq-mühafizə orqanları azərbaycanlı iş adamlarına qarşı istintaq və həbsləri davam etdirir. Son olaraq Sankt-Peterburqda fəaliyyət göstərən tanınmış meyvə-tərəvəz taciri, “Qarpız kralı” ləqəbi ilə tanınan İlhəm Əliyev və onun şəriki Fuad Abdulov barəsində Kalinin Rayon Məhkəməsi hökm çıxarıb.

Sankt-Peterburq məhkəmələrinin birləşmiş mətbuat xidmətinin verdiyi məlumata görə, İlhəm Əliyev sifarişlə adam öldürməyə cəhd və qrup halında adam öldürməyə cəhd maddələri ilə təqsirli bilinərək 19 il 6 ay müddətinə sərt rejimli koloniyada cəza çəkmək üçün məhkum edilib. Onun şəriki Fuad Abdulov isə 9 il azadlıqdan məhrum olunub.

İstintaqın iddiasına görə, Əliyev 2006-cı ilin oktyabrında “Lakomka” adlı şirkətdəki ortağını aradan götürmək üçün 75 min dollar müqabilində sifariş verib. Bu epizod üzrə məhkəmə ona bəraət verib və həmin hissə yenidən istintaqa qaytarılıb. Lakin 2010-cu ildə başqa bir sahibkara qarşı həyata keçirilən sui-qəsd cəhdində onun təqsiri sübuta yetirilib. Belə ki, Fuad Abdulov və onun tərəfdaşları həmin şəxsi “Usadba” restoranının yaxınlığında beysbol bitaları ilə döyüblər.

Rusiya mətbuatı bu prosesi azərbaycanlıların yerli iqtisadi sahələrdə artan təsirinə qarşı daha geniş tədbirlərin tərkib hissəsi kimi qiymətləndirir. Hüquq müdafiəçiləri isə bəzi hallarda azərbaycanlı iş adamlarına qarşı irəli sürülən ittihamların siyasi və ya etnik motivli ola biləcəyindən narahatdırlar.