Rusiya Federasiyasının Təhlükəsizlik və Korrupsiyaya Qarşı Mübarizə üzrə Federal Layihəsinin rəhbəri Vitali Borodin “Crocus City Hall” kompleksinin sahibliyinin azərbaycanlı iş adamı Araz Ağalarovdan alınaraq dövlətə təhvil verilməsini təklif edib. O, bu barədə avqustun 4-də özünün “Telegram” kanalında paylaşım edib.

Borodinin fikrincə, “Crocus”a böyük miqdarda bank kreditlərinin ayrılması və son dövrlərdə ictimaiyyətdə dolaşan cinayət işi ilə bağlı şayiələr bu addımı zəruri edir. O, Ağalarovun Rusiyanı tərk etməsini də bu iddialarla əlaqələndirib.

Məlumatlara görə, avqustun 4-də Moskvada baş vermiş və çoxsaylı insanın ölümü ilə nəticələnmiş “Crocus City Hall” terror aktı ilə bağlı məhkəmə prosesi artıq başlayıb. Qeyd edək ki, hadisədən az əvvəl Araz Ağalarov Rusiyanı tərk edərək Bakıya uçub. Rusiya mediası bunu təzyiqlərin artması və istintaq fonunda ehtiyat addımı kimi dəyərləndirir.

Araz Ağalarov Rusiyanın ən tanınmış iş adamlarından biridir. “Forbes”in məlumatına görə, 2020-ci ildə onun sərvəti 1,7 milyard dollar təşkil edib. O, “Crocus Group” holdinqinin sahibidir. Şirkət Moskva vilayətində geniş fəaliyyət göstərir: ticarət və əyləncə mərkəzləri, “Crocus City Hall” konsert zalı, restoranlar, butiklər və hətta “Myakinino” metro stansiyası bu holdinqə daxildir.

Hazırda “Crocus” imperiyasının gələcəyi ilə bağlı müxtəlif ssenarilər müzakirə olunur. Borodinin açıqlaması isə Rusiya hökumətinin müəyyən dairələrində Ağalarovlara qarşı münasibətin dəyişdiyinin mümkün siqnalı kimi dəyərləndirilir.