Böyük Britaniya, Kanada və Avstraliya sentyabrın 21-də Fələstini rəsmi olaraq dövlət kimi tanıdı. Qərarın yaxın günlərdə bir neçə Avropa ölkəsi tərəfindən də dəstəklənəcəyi gözlənilir.

Böyük Britaniyanın baş naziri Kir Starmer bəyan edib ki, bu addım fələstinlilər və israillilər üçün sülh ümidini dirçəltmək və iki dövlətli həll yoluna nail olmaq məqsədi daşıyır.

Kanadanın baş naziri Mark Karni isə İsrailin son illərdə atdığı addımların Fələstin dövlətinin yaradılması perspektivini “əbədi olaraq aradan qaldırmaq” məqsədinə xidmət etdiyini deyib. O, Qəzzadakı hücumların minlərlə mülki şəxsin ölümü, bir milyondan çox insanın məcburi köçkünə çevrilməsi və beynəlxalq hüququn pozulması ilə nəticələndiyini vurğulayıb.

Avstraliyanın baş naziri Antoni Albaniz isə bu qərarı “iki dövlətli həll yoluna yeni təkan vermək məqsədilə əlaqələndirilmiş beynəlxalq səylərin bir hissəsi” kimi qiymətləndirib. Onun sözlərinə görə, bu səylər Qəzzada atəşkəsin əldə olunması və 7 oktyabr 2023-cü ildə girov götürülənlərin azad edilməsindən başlayır.

İsrailin baş naziri Benyamin Netanyahu bu qərarı sərt şəkildə tənqid edərək, həmin ölkələri HƏMAS-ı mükafatlandırmaqda ittiham edib. O, beynəlxalq aləmdə Fələstin dövlətinin yaradılması çağırışlarına qarşı mübarizə aparacaqlarını bildirib.

HƏMAS isə qərarı alqışlayaraq bunu “Fələstin xalqının mübarizəsinin və qurbanlarının haqlı nəticəsi” adlandırıb.

Hazırda BMT-nin 193 üzvündən 140-dan çoxu Fələstini tanıyır. Sentyabrın 22-də başlayacaq BMT Baş Assambleyasında Fransa, Portuqaliya, Belçika, Lüksemburq və Yeni Zelandiyanın da eyni addımı atacağı gözlənilir.