Bakıdakı istintaq çərçivəsində barəsində 4 aylıq həbs qətimkan tədbiri seçilən SOCAR-ın İnvestisiya departamentinin sabiq rəhbər müavini Adnan Əhmədzadə ilə bağlı yeni ittihamlar ortaya çıxıb. Onun dəbdəbəli həyat tərzi ilə yanaşı, beynəlxalq miqyaslı gizli neft tranziti şəbəkəsində iştirak etdiyi iddia olunur.

“Maltese Herald” nəşri yazır ki, Əhmədzadənin Maltadan Britaniyanın Virciniya adalarına qədər uzanan ofşor şirkətlər şəbəkəsi mövcuddur. İddialara görə, bu şirkətlərdən biri Maltanın ən böyük neft bunkeri hesab olunan, sənəd üzərində xalası oğlu Kamran Ağayevin adına rəsmiləşdirilmiş kommersiya qurumudur. Əslində isə gizli təsisçi Adnan Əhmədzadə olub.

Məqalədə vurğulanır ki, həmin şirkət Maltanın Birzebbuğa şəhərində yerləşən neft terminalından istifadə edərək Rusiya kölgə donanması ilə birgə Avropaya sanksiyalara baxmayaraq rus neftinin daşınmasında iştirak edib. Bundan başqa, Liviyadan qeyri-qanuni yollarla əldə olunan neftin də ticarəti ilə məşğul olmaqda şübhəli bilinirlər.

Məlumata görə, şirkətin fəaliyyəti artıq Avropa İttifaqı və Böyük Britaniya səlahiyyətliləri tərəfindən araşdırılır. İstintaqa səbəb isə Rusiya neftinin saxta sertifikatlarla Avropa bazarlarına ixrac olunması barədə yayılan xəbərlərdir.

Nəşr yazır ki, ötən ildən etibarən Malta bayrağı altında üzən və Rusiya neftinin tranziti ilə məşğul olan tanker gəmilərinin siyahısı da ortaya çıxıb. Bu gəmilər əsasən Rusiyanın Primorsk və Novorossiysk limanlarından Avropa bazarlarına neft daşıyıb.

Hazırda məsələ həm Azərbaycan, həm də Malta hakimiyyətləri üçün ciddi narahatlıq doğurur.