Ermənistan parlamenti oktyabrın 2-də keçirilən fövqəladə sessiyada “Ermənistan və Azərbaycan arasında Sülhün Təsis Edilməsi haqqında” bəyanat qəbul edib. Sənəd 64 lehinə səs ilə təsdiqlənib.

Bəyanatı çoxluqda olan “Vətəndaş Müqaviləsi” Partiyasının fraksiyasının rəhbəri Hayk Koncoryan səsləndirib. O, avqustun 8-də Vaşinqtonda əldə olunmuş razılaşmalara istinad edərək parlamentin bu prosesləri dəstəklədiyini vurğulayıb.

Sənəddə vurğulanır ki, Ermənistan və Azərbaycan ictimaiyyəti, siyasi dairələr, ekspertlər, elm və mədəniyyət nümayəndələri sülhün davamlılığı naminə gərginliyi artıra biləcək bəyanat və hərəkətlərdən çəkinməlidirlər:

“Bu, Cənubi Qafqazın rifahı naminə yaradılmış sülhün davamlılığını və etibarlılığını təmin etmək üçündür”, – bəyanatda qeyd olunub.

Qeyd edək ki, parlamentin iki müxalif fraksiyası sessiyada iştirak etməyib. Onlar sülh prosesini “saxta gündəm” kimi qiymətləndiriblər.

Xatırladaq ki, avqustun 8-də Vaşinqtonda, ABŞ prezidenti Donald Trampın şahidliyi ilə Azərbaycan prezidenti İlham Əliyev və Ermənistanın baş naziri Nikol Paşinyan arasında sülh bəyanatı imzalanıb. Həmin gün, həmçinin iki ölkənin xarici işlər nazirləri sülh sazişinin mətnini paraflayıblar.