İqtisadiyyat üzrə Nobel mükafatı laureatı Daron Acemoğlu Ermənistanın baş naziri Nikol Paşinyana müxalif olaraq yaradılmış “Bizim Yol” hərəkatına qoşulub.

Məlumatı hərəkatın koordinatoru Narek Karapetyan yerli mediaya təsdiqləyib. Onun sözlərinə görə, Acemoğlu hərəkatın milli inkişaf strategiyasını formalaşdıracaq işçi qrupunda iqtisadi məsləhətçi kimi iştirak edəcək.

“Bu, Ermənistan iqtisadiyyatını müasir əsaslar üzərində yenidən qurmaq üçün mühüm tərəfdaşlıqdır,” – deyə Narek Karapetyan bildirib.

“Bizim Yol” hərəkatı Ermənistanda həbsdə olan milyarder Samvel Karapetyan tərəfindən yaradılıb. Karapetyan “Tashir Group” holdinqinin rəhbəri və Ermənistanın ən varlı şəxslərindən biridir. O, iyun ayında hökumət və kilsə arasında yaranmış qalmaqal zamanı Ermənistan Apostol Kilsəsini müdafiə etdiyinə görə “hakimiyyəti ələ keçirməyə çağırış” ittihamı ilə həbs olunub.

Daron Acemoğlu – Türkiyə ermənisi, ABŞ-nin Massaçusets Texnologiya İnstitutunun (MIT) professorudur. O, 2024-cü ildə həmkarları Ceyms Robinson və Saymon Conson ilə birlikdə “rifahın mənşəyi və inkişafın siyasi iqtisadiyyatı” mövzusundakı araşdırmalarına görə Nobel İqtisadiyyat Mükafatına layiq görülüb.

Acemoğlu və Robinsonun məşhur “Millətlər niyə uğursuzluğa uğrayır?” kitabında irəli sürdükləri tezislər — inklüziv siyasi və iqtisadi institutların davamlı inkişafa gətirdiyi, istismarçı sistemlərin isə durğunluğa səbəb olduğu fikirləri — beynəlxalq miqyasda böyük rezonans doğurub.

Qeyd edək ki, 2018-ci ildə Ermənistanda “Məxməri inqilab”dan sonra Paşinyan hökuməti Acemoğlunu iqtisadi islahatlar üzrə məsləhətçi kimi dəvət etmişdi. Lakin hökumət onun təklif etdiyi islahat planını qəbul etməmiş və əməkdaşlıq baş tutmamışdı.

“Bizim Yol” hərəkatı hazırda 2026-cı il parlament seçkiləri ərəfəsində Ermənistanda ən çox müzakirə olunan yeni siyasi qüvvələrdən biri hesab olunur. Narek Karapetyan bildirib ki, hərəkat yaxın üç ay ərzində baş nazirliyə namizədini açıqlayacaq və rəsmi şəkildə siyasi partiya kimi qeydiyyatdan keçəcək.