Uşağın vətəndaşlıq və ad almaq hüququnun tənzimlənməsi “Uşaq hüquqları haqqında” yeni qanun layihəsində əksini tapıb.

Məsələ Milli Məclisin bugünkü iclasında müzakirəyə çıxarılıb. Qanun layihəsinə əsasən, hər bir uşaq doğulduqdan sonra onun doğumu Azərbaycan Respublikasının Ailə Məcəlləsinə uyğun şəkildə qeydiyyata alınır və “Azərbaycan Respublikasının vətəndaşlığı haqqında” Qanunun 12-ci maddəsinin birinci və ikinci hissələrində nəzərdə tutulmuş hallar istisna olmaqla, Azərbaycan vətəndaşlığı əldə edir.

Layihəyə görə, uşağa ad Ailə Məcəlləsinə uyğun qaydada verilir.

Hazırda qüvvədə olan qanuna əsasən, uşağa ad valideynlərin qarşılıqlı razılığı ilə, valideynləri olmadıqda isə qəyyumluq orqanlarının razılığı və ya göstərişi əsasında verilir.

Ailə Məcəlləsinə görə:
• Uşağa ad valideynlərin razılığı ilə verilir;
• Ata adı atasının adına uyğun müəyyən edilir;
• Uşağın soyadı, bir qayda olaraq, valideynlərin soyadı ilə müəyyən olunur.

Valideynlərin soyadları fərqli olduqda, uşağa valideynlərin razılığı ilə ya atanın, ya da ananın soyadı verilir. Adın, ata adının və soyadın verilməsi və dəyişdirilməsi qaydaları müvafiq icra hakimiyyəti orqanı tərəfindən müəyyən edilir.

Valideynlər arasında uşağın ad və soyadı ilə bağlı razılıq əldə olunmadıqda, məsələ müvafiq icra hakimiyyəti orqanı tərəfindən həll edilir.

Atalıq müəyyən edilmədikdə isə uşağa ad ananın göstərişi ilə verilir, ata adı qanunvericiliyə uyğun olaraq uşağın atası kimi qeydə alınan şəxsin adına əsasən yazılır, soyad isə ananın soyadı ilə müəyyən olunur.

Müzakirələrdən sonra qanun layihəsi səsverməyə çıxarılaraq birinci oxunuşda qəbul edilib.