Ukrayna Prezidenti Volodimir Zelenski Fransanın Evian şəhərində keçirilən G7 sammitinin nəticələrini yüksək qiymətləndirib və görüşlərin Ukrayna üçün “mühüm nəticələr” verdiyini bildirib.

Zelenski açıqlamasında əsas razılaşmalardan birinin Ukraynanın hava hücumundan müdafiə imkanlarının əlavə gücləndirilməsi olduğunu qeyd edib.

“Ən vacibi – Ukraynanın hava hücumundan müdafiəsinin daha da gücləndirilməsi barədə razılığa gəldik. Rusiyaya qarşı, müharibəyə son qoymaq məqsədilə təzyiqin artırılması istiqamətində yeni addımlar atılacaq. Tərəfdaşlar müdafiəmizi və enerji dayanıqlığımızı dəstəkləyəcək”, – Zelenski bildirib.

Onun sözlərinə görə, G7 liderləri və Ukrayna əsas çağırışlar və onlara cavab vermək üçün konkret addımlar barədə ümumi mövqeyə malikdir.

“Qlobal birliyimiz Ukraynaya qarşı bu ağılsız və cinayətkar təcavüzün davam etdirilməsi imkanlarını real şəkildə azaldır”, – Ukrayna Prezidenti vurğulayıb.

Kanada: Trampın Ukrayna siyasəti dəyişib

Kanadanın Baş naziri Mark Karni ABŞ Prezidenti Donald Trampın Ukrayna məsələsində mövqeyinin dəyişdiyini bildirib.

Karni qeyd edib ki, ABŞ və Tramp Rusiyanın Ukraynaya qarşı müharibəsi ilə bağlı yanaşmasını dəyişərək G7 liderlərinin fikrincə, vəziyyətə daha real baxış nümayiş etdiriblər.

Kanada lideri bildirib ki, son 36 saat ərzində Tramp ilə 7-8 dəfə danışıb və müxtəlif məsələləri müzakirə edib.

G7 Rusiyaya qarşı təzyiqi artırmaq barədə razılaşıb

G7 sammitinin yekun bəyanatında liderlər Rusiyanın hərbi iqtisadiyyatına qarşı təzyiqlərin artırılması və yeni sanksiyaların sərtləşdirilməsi barədə razılığa gəliblər.

Bəyanatda xüsusilə Rusiyanın enerji sektoruna, o cümlədən neft və qaz gəlirlərinə təsir edəcək tədbirlərin nəzərdən keçiriləcəyi bildirilib.

G7 ölkələri Ukraynanın “azadlığını, suverenliyini və ərazi bütövlüyünü müdafiə etdiyini” qeyd edərək Kiyevə dəstəyin davam etdiriləcəyini vurğulayıblar.

Sammit iştirakçıları Ukraynaya əlavə hava hücumundan müdafiə sistemləri, raketlər, uzaqmənzilli və digər silahların tədarükünü artırmaq barədə razılaşıblar.

Bundan əlavə, G7 liderləri Ukraynaya öz ərazisində hərbi məhsul istehsalını genişləndirməyə imkan verəcək lisenziyaların verilməsi məsələsini də nəzərdən keçirəcəklərini bildiriblər.