Ermənistandan olan nümayəndə heyəti quru yolu ilə Azərbaycana səfərə gəlib.

Azərtacın xəbərinə görə, nümayəndə heyəti 10–12 aprel tarixlərində azərbaycanlı həmkarları ilə birlikdə “Sülh Körpüsü Təşəbbüsü” çərçivəsində keçiriləcək dəyirmi masa tədbirində iştirak edəcək.

19 nəfərdən ibarət heyətdə qeyri-hökumət təşkilatlarının rəhbərləri, jurnalistlər, ekspertlər və ictimai fiqurlar yer alır. Nümayəndə heyəti Ermənistanla Azərbaycan arasında delimitasiya və demarkasiya olunmuş quru sərhəd sahəsində pasport yoxlanışından keçərək ölkəyə daxil olub.

Tədbirdə müzakirələrin cəmiyyətlər arasında sülhün təşviqi, qarşılıqlı etimadın artırılması və sülh prosesinin növbəti mərhələlərinə həsr olunacağı gözlənilir.

“Sülh Körpüsü” təşəbbüsü çərçivəsində ilk görüş ötən ilin 22 oktyabrında azərbaycanlı QHT rəhbərlərinin Yerevana səfəri ilə baş tutub. Noyabr ayında isə erməni nümayəndə heyəti təyyarə ilə Bakıya gəlib.

Bu ilin fevralında Azərbaycandan olan nümayəndə heyəti Aşağı Əskipara kəndi ilə Voskepar kəndi arasındakı delimitasiya olunmuş quru sərhədindən keçərək Ermənistana daxil olub və Tsaxkadzor şəhərində keçirilən tədbirdə iştirak edib.

Bundan əvvəl bəzi təhlilçilər Azərbaycandakı müstəqil vətəndaş cəmiyyəti nümayəndələrinin prosesdən kənarda qalmasını tənqid edərək, təşəbbüsün dövlətlər tərəfindən monopoliyaya alındığını bildiriblər.