“Toplum TV”nin həbsdə olan həmtəsisçisi, media eksperti Ələsgər Məmmədli ilə ailə üzvlərinin görüşünə icazə verilmədiyi iddia olunur.

Bu barədə onun həyat yoldaşı Günay Məmmədli sosial şəbəkə hesabında paylaşım edib. Onun sözlərinə görə, mayın 31-də Ələsgər Məmmədlinin 82 yaşlı anası və xərçəng xəstəliyindən əziyyət çəkən bacısı Bakı İstintaq Təcridxanasına gələrək onunla görüşmək istəyiblər. Ailə üzvlərinin 400 kilometrdən çox məsafə qət etməsinə baxmayaraq, görüş baş tutmayıb.

Günay Məmmədli bildirib ki, uzun müddətdir həbsdə saxlanılan media eksperti ailə üzvləri ilə qanunla nəzərdə tutulan telefon zəngləri və görüşlər vasitəsilə mənəvi dəstək alırdı. O, görüşə icazə verilməməsinin səbəbinin açıqlanmadığını qeyd edərək, buna etiraz edib.

Məsələ ilə bağlı aidiyyəti dövlət qurumlarının mövqeyini öyrənmək mümkün olmayıb.

Xatırladaq ki, “Toplum TV işi” üzrə ümumilikdə 10 nəfər cinayət məsuliyyətinə cəlb edilib. Onların arasında III Respublika Platformasının spikeri Akif Qurbanov, qurumun təsisçilərindən Ruslan İzzətli, jurnalistlər və ictimai fəallar da var.

Təqsirləndirilən şəxslər əvvəlcə qaçaqmalçılıq ittihamı ilə üzləşsələr də, sonradan ittihamlar ağırlaşdırılıb. Onlar irəli sürülən ittihamları qəbul etmir, həbslərinin siyasi motivli olduğunu bildirirlər. Hüquq-mühafizə orqanları isə ittihamların qanunvericiliyə uyğun əsaslarla irəli sürüldüyünü bəyan edib.