Batumi Şəhər Məhkəməsi Batumelebi/Netgazeti-nin təsisçisi və direktoru Mzia Amağlobelini 2 il müddətinə azadlıqdan məhrum edib. Jurnalist Gürcüstan Cinayət Məcəlləsinin 353-cü maddəsi – ictimai asayişin müdafiəçisinə qarşı zorakılıq – üzrə təqsirli bilinib.

Hadisə bu ilin yanvar ayında baş verib. Mzia Amağlobeli 12 yanvar gecəsi binaya stiker yapışdırdığı üçün saxlanılıb və elə həmin gün sərbəst buraxılıb. Lakin iki saat sonra Batumi polis rəisi İrakli Dqebuadzeni guya yanağından vurduğu iddiası ilə yenidən həbs olunub.

Avqustun 4-də keçirilən məhkəmə iclasında Amağlobeli yekun çıxış hüququndan istifadə edərək bildirib ki, ona qarşı irəli sürülən ittihamların siyasi motivli olduğunu düşünür. Jurnalist deyib ki, onun “Dərin Dövlət”in agenti olmaqda ittiham edildiyi iddia olunub:

“Məlum oldu ki, mənə məşqlərdə sillə vurmağı öyrədiblər. İrakli Kobaxidzeyə müraciət edirəm: polis zabitinin ləyaqətini alçaltmaq üçün Dərin Dövlətin səylərinə ehtiyac yoxdur – onlar özləri belə davranırlar”.

Amağlobeli onu da vurğulayıb ki, Batumi polis rəisinin üzünə vurulan sillə polisə hücum sayıla bilməz. Onun sözlərinə görə, müstəntiqlər qərəzli araşdırma aparıb, peşəkar suallar verməyib və prosesdə onun mövqeyinə əhəmiyyət verilməyib:

“İrakli Dqebuadze mənə 4 ildən 7 ilə qədər həbs cəzası verəcəyini dedi və prokurorluq da onu dəstəklədi”.

Mzia Amağlobelinin hüquqlarını Gürcüstan Gənc Hüquqşünaslar Assosiasiyası müdafiə edir. Onlar artıq Avropa İnsan Hüquqları Məhkəməsinə (AİHM) müraciət ediblər. Jurnalist həbs olunduqdan sonra 38 günlük aclıq aksiyası keçirib və yalnız səhhəti ilə bağlı həkimlərin tövsiyəsindən sonra aksiyanı dayandırıb. Fevralın 7-də Gürcüstan Ombudsmanının təşkil etdiyi həkimlər qrupu onun müayinə edilməli olduğunu qeyd edib və jurnalistin “Vivamed” klinikasında qalması tövsiyə olunub.

Gürcüstanın beşinci Prezidenti Salome Zurabişvili “X” sosial şəbəkəsindəki paylaşımında Amağlobelinin həbsi ilə bağlı bunları yazıb:

“Bu ədalət deyil, siyasi təqibdir. Mzia Amağlobeli onun ruhunu sındırmaq üçün sonsuz maneələrdən və qeyri-insani şərtlərdən keçir”.

ABŞ Konqresinin Helsinki Komissiyası isə məsələ ilə bağlı sərt bəyanat yayıb. Komissiyanın fikrincə, hakim “Gürcü Arzusu” partiyası azad medianı susdurmaq və öz korrupsiyasını ört-basdır etmək üçün siyasi motivli təqiblərə əl atır:

“Onlar yanvar ayından siyasi motivli ittihamlarla məhkəməyə qədər həbsdə olan jurnalist Mzia Amağlobelini susdurmağa çalışıblar”.

Jurnalistin həbsi Gürcüstanda söz azadlığı və medianın vəziyyəti ilə bağlı beynəlxalq narahatlıqları bir daha gündəmə gətirib.