Həbsdə olan tədqiqatçı və sülh fəalı Bəhruz Səmədovun cərimə kamerasında (“karser”) saxlanılma müddəti daha bir ay uzadılıb.

Bu barədə ictimai fəal Əmrah Təhməzov B.Səmədovun nənəsi Zibeydə Osmanovaya istinadən məlumat verib. Oktyabrın 26-da Z.Osmanova nəvəsilə onun saxlanıldığı 11 saylı Cəzaçəkmə Müəssisəsində görüşüb.

Məlum olub ki, B.Səmədov oktyabrın 25-də cərimə kamerasından çıxarılmalı idi, lakin müəssisə rəhbərliyi onun “karser”də qalma müddətini daha 30 gün artırıb.

Səmədov nənəsinə bildirib: “Mənim günahım nədir ki, məni bir ay da burada saxlayırlar? Niyə məhkəmələrim qapalı keçirilir? Deyirlər, dövlətə xəyanət etmisən. Hansı sirri vermişəm? Mən sülh tərəfdarıyam, müharibə istəmirəm.”

Fəal həmçinin psixoloji durumunun ağır olduğunu və özünü öldürmək həddinə çatdığını deyib.

Əldə edilən məlumata görə, cəza müddətinin sonunda Bəhruz Səmədovun Umbakı Penitensiar Kompleksinə köçürülməsi planlaşdırılır. Əmrah Təhməzovun sözlərinə görə, müəssisə rəhbərliyi karser qərarını “ümumi kamerada Qarabağ müharibəsi iştirakçısının olması” ilə əsaslandırıb və tərəflər arasında “mümkün münaqişə” riskindən danışıb.

Təhməzov bu izahı əsassız sayıb:

“Bəhruz sülh tərəfdarıdır və qazilərə qarşı hörmətlidir. Əgər problem varsa, qazini köçürsünlər. 82 yaşlı nənəsini uzaq məsafələrdə görüşə məcbur etməklə əlavə əzab verirlər.”

Yaxınları bildirirlər ki, B.Səmədov həbs müddətində iki dəfə intihara cəhd edib.

Penitensiar Xidmət hələlik məsələ ilə bağlı açıqlama verməyib.

Çexiyanın Karlov Universitetinin doktorantı olan Bəhruz Səmədov 2024-cü il avqustun 21-də Dövlət Təhlükəsizliyi Xidməti tərəfindən saxlanılıb. 2025-ci il iyunun 23-də Bakı Ağır Cinayətlər Məhkəməsi onu dövlətə xəyanət maddəsi ilə 15 il müddətinə azadlıqdan məhrum edib.

Səmədov ittihamları rədd edir və yalnız sülh çağırışlarına görə cəzalandırıldığını bildirir.