Bakı Ağır Cinayətlər Məhkəməsində “QHT işi” üzrə təqsirləndirilən Nərgiz Muxtarovanın növbəti məhkəmə iclası keçirilib.

Prosesə hakim Leyla Əsgərova-Məmmədova sədrlik edib. Məhkəmədə dövlət ittihamçısı ittiham aktını elan edib.

İttihama görə, Nərgiz Muxtarova vəzifə səlahiyyətlərindən sui-istifadə edərək müxtəlif layihələrlə bağlı sənədləri saxtalaşdırıb. O, “Rasional İnkişaf Uğrunda” Qadınlar Cəmiyyətinin sədri Şəhla İsmayıl və digər şəxslərlə birlikdə ABŞ-da yerləşən fondlardan ümumilikdə 150 min manatdan çox vəsait əldə etməkdə və həmin pulu leqallaşdırmaqda ittiham olunur.

Lakin məhkəmədə ifadə verən Nərgiz Muxtarova özünü təqsirli bilmədiyini, irəli sürülən ittihamların əsassız olduğunu bildirib.

Növbəti məhkəmə prosesi dekabrın 15-nə təyin edilib.

⸻

“QHT işi” barədə

“QHT işi” üzrə istintaq 2025-ci ilin martında başlayıb. Həmin vaxt Vətəndaş Hüquqları İnstitutunun rəhbəri Bəxtiyar Süleymanlı və Seçki Müşahidə Alyansının icraçı direktoru Məmməd Alpay (Məmmədzadə) həbs olunublar.

Aprel ayında isə daha üç nəfər — ictimai fəal Asəf Əhmədov, sosial işçi Zamin Zəki və Əhməd Məmmədzadə barəsində də eyni qərar qəbul edilib.

Qalib Bayramov və Nərgiz Muxtarova barəsində polisin nəzarəti altına vermə qətimkan tədbiri seçilib.

İstintaqa ümumilikdə 100-dən artıq şəxs cəlb olunub. Onlar arasında həm beynəlxalq donor təşkilatlarının nümayəndələri, həm də hökumətyönlü QHT rəhbərləri yer alır.

Həbsə alternativ qətimkan tədbiri seçilənlər arasında “Hüquq və İnkişaf” İctimai Birliyinin rəhbəri Hafiz Həsənov, eləcə də Alman Marşall Fondunun Azərbaycan üzrə keçmiş məsləhətçisi Mehriban Rəhimli də var.

Hazırda Sosial Hüquqlar Mərkəzinin ölkədən kənarda olan rəhbəri Sübhan Həsənli və ictimai fəal Aytac Ağazadə barəsində axtarış qərarı qüvvədədir.