İran parlamenti milli valyuta olan rialın yenidən denominasiya planını təsdiqləyib.

Yeni plana əsasən, əskinaslardan dörd sıfır çıxarılacaq. Beləliklə, 10 000 riallıq əskinas 1 riala bərabər olacaq. Bir rial isə 100 kerana bölünəcək.

İran Mərkəzi Bankı mövcud pul sistemi və valyuta ehtiyatlarına uyğun şəkildə məzənnələrin müəyyənləşdirilməsi, eləcə də xarici valyutanın alış-satış əməliyyatlarını həyata keçirəcək.

“İkili dövriyyə mərhələsi” adlandırılan üç illik keçid dövründə həm köhnə, həm də yeni riallar eyni vaxtda dövriyyədə olacaq. Bu müddət ərzində mövcud əskinas və sikkələr mərhələli şəkildə dövriyyədən çıxarılacaq.

Yüksək inflyasiya və rialın dəyər itirməsi fonunda İranda denominasiya planı uzun illərdir müzakirə mövzusudur. Dörd sıfırın silinməsi maliyyə əməliyyatlarını, mühasibat uçotunu və gündəlik hesablamaları sadələşdirməyə yönəlib.