Ermənistan parlamentinin Xarici əlaqələr komissiyasının sədri Sarkis Xandanyan Azərbaycan–Ermənistan sülh prosesinə dair İstanbulda önəmli açıqlamalar verib. O bildirib ki, rəsmi İrəvan iki ölkənin ilk dəfə bu qədər sülhə yaxın olduğunu hesab edir.

“Vaşinqton Bəyannaməsi tarixi sənəddir”

Xandanyan 8 avqustda Vaşinqtonda imzalanmış Birgə Bəyannaməni “tarixi sənəd” kimi dəyərləndirərək vurğulayıb ki, bu bəyannamə hər iki ölkənin münaqişəni arxada qoymaq və normal münasibətlərə keçmək üçün real siyasi iradəyə sahib olduğunu göstərir.

Onun sözlərinə görə, sənəd suverenlik, ərazi bütövlüyü və sərhədlərin toxunulmazlığı əsasında Ermənistan–Azərbaycan münasibətlərinin yeni mərhələsinə yol açır. Xandanyan ABŞ-ın, xüsusilə də Prezident Donald Trampın vasitəçilik səylərini yüksək qiymətləndirib.

Sülh sazişi son mərhələdə

Erməni rəsmisi deyib ki, sülh sazişinin imzalanması və ratifikasiyası ilə bağlı proses intensiv davam edir. Vaşinqton sammitində paraflanan saziş layihəsi hazırda son mərhələdədir.

Kommunikasiyaların açılması praktik fazaya keçir

Xandanyan qeyd edib ki, regionda nəqliyyat-kommunikasiya dəhlizlərinin açılması üzrə müzakirələr artıq praktik mərhələyə keçib. O, Ermənistanın irəli sürdüyü “Sülh kəsişməsi” təşəbbüsünün tərkib hissəsi olan TRIPP marşrutunun təkcə Cənubi Qafqaz üçün deyil, həm də Mərkəzi Asiya–Avropa arasında qlobal bağlantı baxımından mühüm rol oynayacağını vurğulayıb.

Minsk qrupunun ləğvi – etimad üçün mühüm addım

Deputat çıxışında ATƏT-in Minsk prosesi və onunla bağlı strukturların Azərbaycan və Ermənistanın birgə müraciəti ilə ləğv edilməsini də etimadın möhkəmlənməsi baxımından əhəmiyyətli addım kimi qiymətləndirib.

Ankara–İrəvan dialoqunda ümidverici siqnallar

Xandanyan Türkiyə ilə normallaşma prosesinə də toxunaraq bildirib ki, yaxın zamanda Ankara–İrəvan dialoqunda irəliləyiş və sərhədlərin açılması istiqamətində praktik nəticələr əldə olunacağına ümid edir.

Ermənistan rəsmisinin mesajı regionda sülh prosesinin intensivləşdiyi bir zamanda verilərək diqqət çəkib.