“Abzas Media”nın həbsdə olan qadın jurnalistləri – Sevinc Vaqifqızı, Nərgiz Absalamova və Elnarə Qasımova Bakı İstintaq Təcridxanasından Lənkəranın Qurumba kəndində yerləşən Penitensiar Kompleksə köçürülüblər. Bu barədə məlumatı “Abzas Media” onların yaxınlarına istinadla yayıb.

Jurnalistlərin ailələrinin sözlərinə görə, köçürülmə qəfil baş verib:
“Səhər saat 9-da onlara deyiblər ki, bir saata hazır olun. Lənkərana çatana qədər hara aparıldıqlarını bilməyiblər”.

Onlar həmçinin iddia ediblər ki, köçürülmə zamanı Bakı İstintaq Təcridxanasının rəis müavini Cavid Gülalıyev Nərgiz Absalamovaya qarşı kobud davranıb.

Görüşlər üçün məsafə çətinlik yaradır

Bakıdan Lənkərana iki-üç saatlıq yolun olması ailələrin görüş imkanlarını xeyli məhdudlaşdırır. Jurnalistlərin yaxınları hesab edir ki, onların uzaq rayonda yerləşən müəssisəyə köçürülməsi siyasi təzyiq vasitəsi kimi istifadə olunur.

Hazırda “Abzas Media işi” üzrə həbsdə olan kişi jurnalistlər – Ülvi Həsənli, Məhəmməd Kekalov, Fərid Mehralızadə və Hafiz Babalı isə hökm elan olunduqdan sonra paytaxtdan təxminən 70 km aralıdakı Umbakı Penitensiar Kompleksində saxlanılırlar.

Hüquqi qiymətləndirmə

Vəkil Fariz Namazlı “Facebook” hesabında qeyd edib ki, Avropa İnsan Hüquqları Məhkəməsi (AİHM) əvvəllər məhbusların yaşayış yerlərindən uzaqda yerləşən müəssisələrə köçürülməsini qanunsuz hesab edən qərarlar qəbul edib:
“Avropa Məhkəməsi dəfələrlə vurğulayıb ki, həbsxana rejimi məhkumu ailəsindən qoparmaq vasitəsi olmamalıdır. Əksinə, dövlətin vəzifəsi məhkumun ailə və sosial əlaqələrini qorumaqdır. Məhkumun yaşayış yerindən çox uzaq müəssisəyə göndərilməsi ailənin faktiki olaraq onu görə bilməməsi ilə nəticələnir və bu, Konvensiyanın 8-ci maddəsinin pozulmasıdır”.

Hökm

Xatırladaq ki, iyunun 20-də Bakı Ağır Cinayətlər Məhkəməsində elan edilən hökmə əsasən, “Abzas Media” direktoru Ülvi Həsənli, baş redaktor Sevinc Vaqifqızı, jurnalistlər Hafiz Babalı və Fərid Mehralızadə 9 il, Nərgiz Absalamova və Elnarə Qasımova 8 il, koordinator Məhəmməd Kekalov isə 7 il 6 ay azadlıqdan məhrum edilib.

Onlar qaçaqmalçılıq da daxil olmaqla bir sıra maddələr üzrə ittiham olunublar. Lakin jurnalistlər və müdafiəçiləri ittihamların əsassız olduğunu, istintaqın isə tutarlı sübutlar təqdim etmədiyini bildirirlər.