Prezident İlham Əliyev “Media haqqında” Qanuna yeni dəyişiklikləri imzalayaraq, Azərbaycanda mətbuat azadlığına qarşı məhdudiyyətləri daha da sərtləşdirib. Qanuna edilən əlavə və düzəlişlər media subyektlərinin qeydiyyatı, fəaliyyət dairəsi, informasiya agentlikləri və xarici media nümayəndələri üçün yeni inzibati tələblər və məhdudiyyətlər müəyyən edir.

Yeni dəyişikliklərə əsasən:
• Media subyektlərinin adları başqa media orqanlarının adları ilə eyni və ya oxşar olmamalı, həmçinin ictimai qaydaya, mənəviyyata və əxlaqa zidd ifadələrə yer verilməməlidir (62.6-cı maddə).
• Media Reyestri ilə bağlı tələblər sərtləşdirilir – reyestrdə qeydiyyatdan keçməyən çap mediasının nəşri qadağan olunur və belə fəaliyyətə görə 5000 manatadək cərimə nəzərdə tutulur.
• İnformasiya agentliklərinə yeni şərtlər qoyulur – agentliklərin azı 20 media orqanı ilə müqaviləsi və azı 5 xarici ölkədə akkreditə olunmuş jurnalisti olmalıdır.
• Xarici media orqanlarının Azərbaycanda fəaliyyətinə əlavə məhdudiyyətlər tətbiq edilir.
• Qanuna, həmçinin mediada saxta məlumatların qarşısının alınmasına dair ümumi öhdəliklər daxil edilib.

Tənqidçilər hesab edir ki, bu dəyişikliklər ölkədə azad və tənqidi medianın boğulması məqsədi güdür. Qanun ilk dəfə 2021-ci ildə qəbul olunmuş və həm yerli, həm də beynəlxalq jurnalist təşkilatları tərəfindən sərt şəkildə tənqid olunmuşdu. Son dəyişikliklər bu tənqidlərin daha da artmasına səbəb olub.

Hazırda Azərbaycanda təxminən 29 jurnalist həbsdədir. Onların əksəriyyəti tənqidi və araşdırmaçı jurnalistika ilə məşğul olduqlarına görə həbs olunmuş hesab edilir. Bu fonda qanunvericiliyin daha da sərtləşdirilməsi, müşahidəçilərin fikrincə, mətbuat azadlığına qarşı sistemli və məqsədli kampaniyanın bir hissəsidir.

Mənbə: foto.info.az