İyulun 23-də hökumətyönlü mediada yayımlanan və “Külli miqdarda maliyyə vəsaitləri xaricdən gizli yolla Azərbaycana necə keçirilib?” başlıqlı videomaterialda bir sıra müstəqil media qurumları – o cümlədən AbzasMedia, Meydan TV və HamamTimes TV – xaricdən qeyri-qanuni maliyyələşməkdə ittiham olunub.

Mütəşəkkil Cinayətkarlıq və Korrupsiyaya Qarşı Mübarizə Layihəsinin (OCCRP) məlumatlarını əsas gətirən Civilazerbaijan.com xəbər verir ki, videoda bu media qurumları “xarici qrant şəbəkəsi”nin bir hissəsi kimi təqdim edilir və onların guya Azərbaycanda ictimai rəyə təsir etmək üçün qərəzli informasiya yaydığı iddia olunur.

AbzasMedia yayılan materiala münasibət bildirib və yayılan ittihamların əsassız olduğunu bəyan edib. Redaksiya bildirib ki, təqdim edilən iddiaların nə hüquqi, nə də faktiki əsası var.

“AbzasMedia hazırda Azərbaycan ərazisində fəaliyyət göstərmir və ölkə daxilində heç bir fiziki və ya hüquqi şəxslə əməkdaşlıq etmir. 2023-cü ilin noyabrında əməkdaşlarımıza qarşı başlanan həbslərdən sonra bu barədə ictimaiyyətə məlumat vermişik. Artıq bir ildən çoxdur ki, fəaliyyətimizi xaricdə yaşayan jurnalistlər və baş redaktorla davam etdiririk”, – deyə bəyanatda qeyd olunur.

AbzasMedia, yayımlanan videomaterialın əsas məqsədinin ictimai rəyi çaşdırmaq və müstəqil medianın nüfuzuna xələl gətirmək olduğunu bildirib.

“Bu cür informasiya kampaniyaları müstəqil jurnalist fəaliyyətinə kölgə salmağa, ictimai maraqları qorumağa çalışan media orqanlarını gözdən salmağa yönəlib”, – deyə açıqlamada bildirilir.

Qurum eyni zamanda qeyd edib ki, 7,5–9 il arası həbs cəzası alan AbzasMedia əməkdaşları heç bir qanunsuz fəaliyyətlə – o cümlədən qaçaqmalçılıqla – məşğul olmayıb:

“Onların yeganə fəaliyyəti korrupsiya, vəzifə səlahiyyətlərindən sui-istifadə və digər hüquq pozuntuları ilə bağlı ictimaiyyəti məlumatlandırmaq olub. Onlar məhz bu fəaliyyətlərinə görə hədəf alınıblar”.

AbzasMedia vurğulayıb ki, fəaliyyətlərini insan hüquqlarının qorunması və korrupsiyaya qarşı mübarizə prinsiplərinə əsaslanaraq davam etdirirlər.