USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
“Meydan TV işi” üzrə məhkəmədə Aynur Elgünəşin sərt çıxışı
Sentyabrın 20-də Bakı Xətai Rayon Məhkəməsində “Meydan TV işi” üzrə həbsdə saxlanılan jurnalistlərin növbəti məhkəmə prosesi keçirilib. Məhkəmənin qərarı ilə jurnalistlər Aynur Qənbərova (Elgünəş), Aysel Umudova, Natiq Cavadlı, Xəyalə Ağayeva və Ramin Cəbrayılzadənin (Deko) həbs müddəti 2025-ci il yanvarın 6-na qədər uzadılıb.
Məhkəmə zalında çıxış edən “Meydan TV”-nin redaktoru Aynur Elgünəş hakimlərə və cəmiyyətə sərt mesajlar ünvanlayıb. O, Aristotelin köləlik barədə nəzəriyyəsinə istinad edərək Azərbaycan cəmiyyətində çoxlarının idarə olunmağa boyun əydiyini bildirib:
“Həbsxanaya düşənə qədər Aristotelin köləliklə bağlı yanaşması ilə razılaşmırdım. O deyirdi ki, bəzi insanlar kölə olmaq üçün doğulur. Bu 10 ayda dərk etdim ki, Azərbaycanda böyük əksəriyyət idarə olunmağa meyillidir, buna etiraz etmir, edəni də qınayır. Bizim onlardan, həm də sizdən fərqimiz odur ki, ruhən kölə doğulmamışıq”.
Elgünəş həmçinin hakimləri də azad iradədən məhrum olmaqda ittiham edib:
“Mən təkcə jurnalist fəaliyyətimə görə deyil, həm də azad ruhuma görə cəzalandırılıram. Siz bir hakim kimi azad qərar vermək iqtidarında deyilsiniz. Çünki ruhunuz məhkumdur. Özünüzə hakim mantiyası altında notarius xidməti göstərməyi rəva bilirsiniz”.
O, çıxışını belə tamamlayıb:
“Yaşasın azad ruh! Biz həbsxanadan nə vaxtsa çıxacağıq, ancaq siz bu halınıza ömürlük məhkumsunuz”.
Beləliklə, Aynur Elgünəş məhkəmə çıxışında hakimləri və ümumilikdə cəmiyyətin böyük hissəsini “ruhən kölə” adlandırıb.
