SOCAR-ın İnvestisiya departamentinin sabiq rəhbər müavini, hazırda həbsdə olan iş adamı Adnan Əhmədzadənin qurumun sabiq vitse-prezidenti Mikayıl İsmayılovla yaxın əlaqələrinin olduğu barədə məlumat yayılıb.

Məsələdə diqqətçəkən məqam Adnan Əhmədzadənin müdafiəçisi, vəkil Şaiq Mirzəyevin adı ilə bağlıdır. Mirzəyev bir vaxtlar “Az-Qranata” MMC-nin baş direktoru olub. Sözügedən şirkətin isə Mikayıl İsmayılova və ailəsinə məxsusluğu barədə mediada dəfələrlə yazılıb. Hazırda Şaiq Mirzəyev, həmçinin Mikayıl İsmayılovun oğlu Orxan İsmayılzadənin atalıq məsələsi üzrə məhkəmə çəkişmələrində vəkil qismində iştirak edir.

Xatırladaq ki, 2012-ci ildə Orxan İsmayılzadə ilə Fidan Abbasovanın faktiki nikah münasibətləri olub və bu birlikdən 2015-ci ildə övlad dünyaya gəlib. Lakin Abbasovanın iddiasına görə, Orxan İsmayılzadə övladının atasını qəbul etməyib. Proses zamanı Mikayıl İsmayılovun da məsələyə şəxsi müdaxilə etdiyi bildirilir. Sonrakı illərdə tərəflər arasında aliment və atalıqla bağlı məhkəmə çəkişmələri davam edib.

Bu ilin əvvəlində Orxan İsmayılzadənin vəkili Şaiq Mirzəyev Fidan Abbasovaya barışıq sənədi təqdim edib. Sənəddə aliment əvəzinə birdəfəlik 65 min manat ödənilməsi nəzərdə tutulsa da, Abbasova sənədi imzalamayıb və aliment tələbində israr edib. Onun sözlərinə görə, hazırda İstanbulda yaşayan Orxan İsmayılzadə aylardır ki, aliment ödəmir.

Fidan Abbasova həmçinin ehtimal edir ki, Şaiq Mirzəyevin Adnan Əhmədzadəyə vəkil təyin olunmasında keçmiş qayınatası Mikayıl İsmayılovun rolu ola bilər.

Qeyd edək ki, Adnan Əhmədzadə sentyabrın 19-da Dövlət Təhlükəsizliyi Xidmətinin əməkdaşları tərəfindən saxlanılıb. Ertəsi gün Səbail Rayon Məhkəməsi onun barəsində 4 aylıq həbs qətimkan tədbiri seçib. Rəsmi məlumat verilməsə də, Əhmədzadənin Azərbaycanın iqtisadi təhlükəsizliyinə qarşı təxribat törətmək və külli miqdarda mənimsəmə ittihamları ilə üzləşdiyi bildirilir.