Son araşdırmalara görə, 20 ildən artıq deputat olan Ülvi Quliyevin oğlu Orxan Quluzadəyə məxsus “Diler İnşaat” QSC şirkəti bu dəfə Ağdam şəhərində 5 nömrəli yaşayış massivi üzrə yeni tenderin qalibi olub. Şirkət layihə çərçivəsində yaşayış və qeyri-yaşayış binalarının daxili kommunikasiya işlərini və avadanlıqların satın alınmasını həyata keçirəcək.

Qeyd olunur ki, əvvəlki tenderdə şirkətə 15.8 milyon manat ödənilmişdi. Yeni tender isə şirkətə təxminən 32 milyon manat dəyərində vəsait təmin edəcək.

“Diler İnşaat” QSC ölkənin bir sıra tanınmış layihələrinin – Trump Tower, Flame Towers, Socar Tower, Port Baku Towers, Dəniz oteli Crescent Hotel, Dəniz Mall – tikintisində də iştirak edib. Şirkət əvvəlcə “Orxan 1989” MMC adı ilə təsis edilib, daha sonra “Diler İnşaat” MMC və son olaraq “Diler İnşaat” QSC adı ilə fəaliyyət göstərir.

Bundan əlavə, Orxan Quluzadə “Loğman Farm” MMC adlı digər şirkətin də təsisçisidir və həmin şirkət də bir neçə dəfə tenderlərin qalibi olub.

Bu vəziyyət ölkədə dövlət satınalmalarında tanınmış şəxslərin ailə üzvlərinə üstünlük verilməsi məsələsini yenidən gündəmə gətirir.