Bu gün Vyanada 2026-cı ilin ikinci Supplementary Human Dimension Meeting (SHDM) öz işinə başlayıb.

11–12 may tarixlərində keçirilən tədbirin əsas mövzusu “Rəqəmsal Dövrdə Vətəndaş Məkanının Qorunması”dır. Toplantı Hofburq Konqres Mərkəzinin Ratsaal konfrans zalında təşkil olunub.

Tədbir ATƏT çərçivəsində keçirilir və rəqəmsal təhlükələr, dezinformasiya, vətəndaş cəmiyyətinin müdafiəsi və media azadlığı kimi məsələlərə həsr olunub.

Açılış sessiyasında Dagmar Schmidt Tartagli, Maria Telalian, Philippe Tremblay və Anu Juvonen çıxış edəcəklər.

Birinci sessiyada rəqəmsal nəzarət texnologiyalarının jurnalistlərə, hüquq müdafiəçilərinə və vətəndaş cəmiyyətinə təsiri müzakirə olunacaq. Casus proqramları, biometrik izləmə və süni intellekt əsaslı monitorinq sistemlərinin yaratdığı risklər əsas müzakirə mövzularındandır.

Mayın 12-də keçiriləcək ikinci sessiya dezinformasiya və onun insan hüquqları, media azadlığı və demokratik proseslərə təsirinə həsr olunacaq. Sessiyada xüsusilə qadın jurnalistlərə və hüquq müdafiəçilərinə qarşı onlayn hücumlar, koordinasiyalı informasiya manipulyasiyası və nifrət kampaniyaları müzakirə ediləcək.

Üçüncü sessiyada isə vətəndaş cəmiyyətinin rəqəmsal dayanıqlığının gücləndirilməsi, müstəqil medianın qorunması, kibertəhlükəsizlik alətləri və beynəlxalq əməkdaşlıq imkanları diqqət mərkəzində olacaq.

Toplantının yekununda işçi sessiyaların hesabatları təqdim ediləcək və iştirakçı dövlətlərin nümayəndələri çıxış edəcəklər.