İranın xarici işlər naziri Abbas İraqçi Ermənistanın baş naziri Nikol Paşinyanı və onun partiyasını parlament seçkilərində qələbə münasibətilə təbrik edib və qonşu ölkələrin Tehranın xarici siyasətində prioritet olaraq qaldığını vurğulayıb.

Bazar ertəsi axşam “X” hesabında qismən erməni dilində yazdığı mesajında İraqçi seçkilərin nəticələri münasibətilə Paşinyana təbriklərini çatdırıb və Tehranla İrəvan arasında konstruktiv əməkdaşlığın genişləndirilməsi üçün yaranan əlverişli şəraiti alqışlayıb.

İraqçi qeyd edib: "Zati-aliləri Baş nazir Nikol Paşinyanı partiyasının seçkilərdəki qələbəsi münasibətilə səmimi qəlbdən təbrik edirəm. Qonşularımız bizim prioritetimizdir".

O əlavə edib: "Ermənistanda parlament seçkilərinin uğurla keçirilməsi, Baş nazir cənab Nikol Paşinyanın və onun rəhbərlik etdiyi partiyanın qələbəsi münasibətilə təbrik edirəm".

"İran-Ermənistan münasibətlərində formalaşmış müsbət və dinamik kursun gücləndirilməsinə yönəlmiş konstruktiv əməkdaşlığı davam etdirmək üçün əlverişli imkanların yaranması bizi sevindirir," - deyə xarici işlər naziri bildirib.

Bazar ertəsi ölkənin Mərkəzi Seçki Komissiyasından (MSK) verilən məlumata görə, Paşinyanın "Mülki Müqavilə" partiyası səslərin 49,81 faizini toplayaraq seçkidəki digər rəqiblərinə böyük fərqlə qalib gəlib. Əsas müxalifət olan "Güclü Ermənistan" isə 23,29 faizlə xeyli geridə qalaraq ikinci yeri tutub.

MSK-nın məlumatına görə, dənizə çıxışı olmayan üç milyonluq ölkədə seçici fəallığı səsvermə hüququna malik olanların 58 faizindən çoxunu təşkil edib.
Paşinyan "Ermənistanın əbədiliyini və inkişafını təmin edəcək tarixi qələbə" qazandıqlarını bəyan edib. O, Ermənistanın Rusiya ilə münasibətlərini inkişaf etdirməklə yanaşı, eyni zamanda "Qərblə yaxınlaşma kursunu davam etdirəcəyinə" söz verib.