Erməni ekspert Voskan Sərkisyan Azərbaycanın sabiq təhsil naziri Misir Mərdanovun illər əvvəl Ermənistana səfəri və doğulduğu Dilican bölgəsi ilə bağlı xatirələrindən yazıb.

Ekspert bildirib ki, Azərbaycan Prezidentinin köməkçisi Hikmət Hacıyevin Dilicanda keçirdiyi işgüzar görüş diqqət çəkib. Onun sözlərinə görə, Birinci Qarabağ müharibəsindən sonra yüksək vəzifəli Azərbaycan rəsmilərinin bu bölgəyə səfərləri nadir hadisələrdən hesab olunur.

Voskan Sərkisyan qeyd edib ki, bundan əvvəl belə səfərlərdən biri Misir Mərdanov tərəfindən həyata keçirilib.

Məlumata görə, 1998-2013-cü illərdə Azərbaycanın təhsil naziri olmuş Misir Mərdanov 1946-cı ildə Dilicanın Göyərçin kəndində anadan olub.

Erməni ekspertin yazdığına görə, Mərdanov 2001-ci ildə beynəlxalq tədbirdə iştirak etmək üçün Ermənistana səfəri zamanı atasının yaşadığı evi görmək istəyib. Ona bu imkan yaradılıb.

Sərkisyan bildirib ki, sabiq nazir Milli Təhlükəsizlik Xidmətinin nümayəndələrinin müşayiəti ilə doğma kəndinə gedib, burada yaşayan sakinlərlə görüşüb. Onun sözlərinə görə, Mərdanov evdə yaşayan insanların qonaqpərvərliyindən məmnun qalıb və bağdan Bakıya aparmaq üçün torpaq götürüb.

Ekspert həmçinin qeyd edib ki, Mərdanovların Dilicanın Göyərçin kəndindəki ata evi vaxtilə kənddə seçilən tikililərdən biri olub.

Yazıda bildirilir ki, Misir Mərdanovun atası Cumayıl Mərdanov həmin ərazidə kolxoz sədri olub və ailənin evi də kolxoz rəhbərinə uyğun böyük ikimərtəbəli tikili kimi tanınıb.

Sərkisyanın sözlərinə görə, sonradan həmin ev başqa şəxsə satılıb.