Ukrayna Təhlükəsizlik Xidməti — SBU Rusiyanın Vladimir vilayətində yerləşən “Vtorovo” neft nəqli stansiyasına zərbə endirdiyini açıqlayıb.

SBU-nun məlumatına görə, hücum iyunun 27-də pilotsuz uçuş aparatları ilə həyata keçirilib. Bildirilir ki, dronlar obyektin texniki binalarına düşüb və bundan sonra partlayış baş verib.

Ukrayna tərəfi bu zərbənin Rusiyaya qarşı 40 günlük “təsir əməliyyatı” çərçivəsində həyata keçirildiyini bildirib. SBU-nun iddiasına görə, “Vtorovo” stansiyası açıq neft məhsullarının həm ixrac limanlarına, həm də Rusiyanın daxili istehlakçılarına daşınması baxımından mühüm logistika obyektidir.

SBU həmçinin qeyd edib ki, bu, son bir ay ərzində “Vtorovo” stansiyasına ikinci zərbədir. Əvvəlki hücumun iyunun 10-da baş verdiyi bildirilir.

Vladimir vilayətinin yerli hakimiyyət orqanları SBU-nun bu açıqlamasına münasibət bildirməyib.

Bununla yanaşı, NASA-nın peyk monitorinqi sistemi olan FIRMS iyunun 27-nə olan məlumata görə, “Vtorovo” neft stansiyasının ərazisində yanğın qeydə almayıb. Lakin sistem obyektə təxminən 10 kilometr məsafədə yanğın aşkar edib.

Son günlər Ukraynanın Rusiyadakı neft emalı və yanacaq infrastrukturlarına zərbələrinin artdığı bildirilir. Bu hücumlar fonunda Rusiyanın bir sıra regionlarında yanacaq satışına məhdudiyyətlər tətbiq olunub.

Reuters-in qiymətləndirməsinə görə, iyunun sonuna doğru Rusiyada benzin istehsalı illik müqayisədə 25 faiz azalıb.