Fransada ekstremal istilər fonunda gündəlik ölüm göstəricilərində ciddi artım qeydə alınıb.

Son günlər Qərbi Avropanı təsiri altına alan isti hava dalğası Fransada xüsusilə ağır nəticələrə səbəb olub. İlkin məlumatlara görə, iyunun 24-dən etibarən ölkədə ölüm halları əvvəlki aylardakı orta göstəricilərlə müqayisədə təxminən 1000 nəfər çox olub.

İyunun 24-də Fransada bütün səbəblər üzrə 1200-dən çox ölüm qeydə alınıb. İyunun 25 və 26-da isə bu rəqəm 1400-dən yuxarı olub. Müqayisə üçün, aprel və may aylarında gündəlik ölüm halları əsasən 900–1000 arasında dəyişirdi.

Ölüm hallarındakı artım daha çox “qırmızı” təhlükə səviyyəsinin elan edildiyi bölgələrdə müşahidə olunub. Bu bölgələr arasında İl-de-Frans, Yeni Akvitaniya, Bretan, Mərkəz — Val-de-Luar, Normandiya və Pei-de-la-Luar yer alır.

Məlumata görə, ölüm hallarının artması bütün yaş qruplarında qeydə alınıb. Bununla belə, həyatını itirənlərin 85 faizi 65 yaş və yuxarı insanlardır. Xüsusilə ev şəraitində dünyasını dəyişənlərin sayında artım diqqət çəkir.

Fransada bir neçə gün davam edən kəskin istilər zamanı bəzi bölgələrdə temperatur 40 dərəcəni keçib. İyunun 28-də isə ölkədə hava nisbətən sərinləşib. Parisdə temperaturun 29 dərəcə olduğu bildirilir.

Ekstremal istilər Almaniyada da tarixi rekorda səbəb olub. İyunun 27-də Saksoniya-Anhalt əyalətində yerləşən Drevits qəsəbəsində temperatur 41,5 dərəcəyə çatıb. Bu, Almaniyada indiyədək qeydə alınan ən yüksək temperatur göstəricisi hesab olunur.

Bir gün əvvəl isə Saarbrücken yaxınlığında 41,3 dərəcə isti qeydə alınmışdı. Lakin bu rekord cəmi bir gün sonra yenilənib.