İran, İsrailin hücumları davam etdiyi müddətdə atəşkəs danışıqlarına açıq olmayacağını bəyan edib. Bu barədə “Reuters” agentliyi Dubaydan anonim rəsmi mənbəyə istinadla məlumat yayıb.

Mənbənin sözlərinə görə, İran, ABŞ və İsraillə təmaslarda vasitəçilik edən Qətər və Omana açıq şəkildə bildirib ki, yalnız İsrailin qabaqlayıcı zərbələrinə cavab verdikdən sonra danışıqlara başlamağa hazır ola bilərlər.

“İranlılar qətərli və omanlı vasitəçiləri məlumatlandırıblar ki, İsrailin hücumlarına cavab başa çatmadıqca, ciddi danışıqlara başlamayacaqlar. Onlar vurğulayıblar ki, hücumlara məruz qaldıqları vaxtda atəşkəs müzakirəsi aparmaq mümkün deyil”, – deyə məlumatda bildirilir.

Agentliyin məlumatına görə, İranın guya Qətər və Oman vasitəsilə ABŞ-ni danışıqlara dəvət etməsi və nüvə proqramı ilə bağlı müzakirələrə hazır olduğunu bildirməsi barədə yayılan xəbərlər də gerçəkliyi əks etdirmir.

Hazırkı mərhələdə nə İran, nə də Qətər və Oman bu məlumatlara dair rəsmi açıqlama verməyiblər.

Qeyd edək ki, son aylarda Oman İran və ABŞ arasında nüvə proqramı üzrə danışıqlarda vasitəçilik rolunu oynayıb. Sonuncu danışıqlar raundunun şənbə günü keçirilməsi planlaşdırılsa da, İsrailin hava zərbələri səbəbilə ləğv edilib.

Qətər isə daha əvvəl İran və İsrail arasında təmasların qurulmasında vasitəçi kimi çıxış edib. Həm Qətər, həm də Oman həm Tehran, həm Vaşinqtonla yaxın münasibətlərə sahibdirlər və İsraillə də müəyyən diplomatik əlaqələri saxlayırlar.