Türkiyənin tanınmış jurnalistlərindən biri olan Fatih Altaylı bu gün hüquq-mühafizə orqanları tərəfindən saxlanılıb. Bu barədə məlumatı jurnalistin həyat yoldaşı Hande Altaylı sosial şəbəkə hesabında paylaşıb.

“Bir qədər əvvəl Fatehi apardılar. Hara apardıqlarını bilmirik,” – deyə Hande Altaylı açıqlamasında bildirib.

Saxlanmanın səbəbləri barədə hələlik rəsmi açıqlama verilməyib. Sosial mediada və bəzi müstəqil mənbələrdə Altaylının son günlərdə hakimiyyətə yönəlmiş tənqidi çıxışlarının və yazılarının buna səbəb ola biləcəyi ehtimal edilir.

Fatih Altaylı uzun illərdir Türkiyədə televiziya, qəzet və rəqəmsal media sahəsində tanınmış simalardan biridir. O, həm müstəqil jurnalistika, həm də hakimiyyətin tənqidi ilə bağlı sərt mövqeyi ilə seçilib.

Hadisə ictimaiyyətdə ciddi narahatlıq doğurub. Müxalifət nümayəndələri və media azadlığını müdafiə edən təşkilatlar Altaylının saxlanması ilə bağlı dərhal açıqlama verilməsini və onun hüquqlarına hörmət göstərilməsini tələb ediblər.

Məsələyə dair Türkiyə Daxili İşlər Nazirliyindən və ya prokurorluqdan hələlik heç bir rəsmi reaksiya verilməyib.