BMT-də keçirilən Fələstinlə bağlı xüsusi sammitdə Fransa prezidenti Emmanuel Makron ölkəsinin rəsmi olaraq Fələstini müstəqil dövlət kimi tanıdığını elan edib. “Le Monde” qəzetinin məlumatına görə, Makronun çıxışından dərhal sonra Monako və Lüksemburq da eyni qərarı açıqlayıb.

Makron nitqində Yaxın Şərqdə davamlı sülhün hələ də təmin olunmadığını vurğulayıb:

“Fələstində ərəb dövlətinin yaradılması vədi hələ də yerinə yetirilməyib. Bu, bizim kollektiv məsuliyyətimizdir. Fələstin xalqının qanuni hüquqlarının tanınması İsrail xalqının hüquqlarını heç vaxt azaltmır. Əksinə, bu tanınma İsrailə sülh gətirəcək yeganə çıxış yoludur.”

Fransa lideri həmçinin “iki dövlət, iki xalq üçün” prinsipinin – yəni tarixi Fələstin torpaqlarında yəhudi və ərəb dövlətlərinin yanaşı mövcudluğunun – regionda sülhün bərpası üçün yeganə çıxış yolu olduğunu bildirib. Onun çıxışı zamanı İsrail nümayəndələrinin zalda iştirak etmədiyi qeyd olunub.

Fransa artıq iyul ayında Fələstini tanıyacağını bəyan etmişdi. Son aylarda isə Avropada ardıcıl olaraq oxşar qərarlar qəbul olunub: mayın 22-də Norveç, İrlandiya və İspaniya, sentyabrın 21-də isə Böyük Britaniya, Kanada və Avstraliya Fələstini dövlət kimi tanıyıblar.

Bu addımların əsas məqsədi İsrailə təzyiq göstərmək və 2023-cü ilin payızında HƏMAS-ın hücumundan sonra başlayan Qəzza müharibəsinə son qoymaq kimi qiymətləndirilir. Bir çox beynəlxalq tədqiqatçı və hüquq müdafiəçiləri münaqişəni artıq “fələstinlilərin soyqırımı” adlandırır.

İsrail isə Avropa ölkələrinin qərarlarını sərt şəkildə tənqid edərək, bu addımların HƏMAS-a xidmət etdiyini iddia edib.

Digər tərəfdən, Fələstin Muxtariyyətinin prezidenti Mahmud Abbas BMT Baş Assambleyasında çıxışında bildirib ki, HƏMAS gələcəkdə Fələstinin idarə olunmasında heç bir rola sahib olmayacaq. Abbas vurğulayıb ki, Qəzzanın müharibədən sonrakı idarəçiliyinin əsas şərti bölgənin tam demilitarizasiyası və radikal islamçı qruplaşmanın hakimiyyətdən uzaqlaşdırılmasıdır.