Ermənistanın baş naziri Nikol Paşinyan Avropa Şurası Parlament Assambleyasında (AŞPA) çıxışı zamanı “Zəngəzur dəhlizi” ifadəsinin Ermənistan və Azərbaycan arasında imzalanmış heç bir sənəddə yer almadığını bildirib.

O, AŞPA-da nümayəndələrdən birinin sualını cavablandırarkən qeyd edib:
“Haradan çıxardınız ‘Zəngəzur dəhlizi’ ifadəsini? Harada oxumusunuz? Belə bir ifadə mövcud deyil, olmayıb və əmin olun ki, Ermənistanla Azərbaycan arasında razılaşdırılmış sənədlərdə də olmayacaq.”

Paşinyan əlavə edib ki, bu termin Vaşinqtonda imzalanmış “kiçik sənədlərdə” də istifadə edilməyib və onların diqqətlə oxunmasını tövsiyə edib.

Baş nazirin sözlərinə görə, Ermənistanın suveren ərazisinə bu ölkənin razılığı olmadan hər hansı ad verilməsi yolverilməzdir:
“Bu, qarşılıqlı suverenliyin tanınması prinsipinin kobud şəkildə pozulmasıdır.”

Xatırladaq ki, Azərbaycan hakimiyyətinin apardığı repressiv siyasət nəticəsində Azərbaycan nümayəndə heyəti AŞPA-dan kənarlaşdırılıb.