“Şərur MTK”nın sahibi, iş adamı İsfəndiyar Axundovun (“Şərurlu İsfəndiyar”) barəsində xüsusi ittiham qaydasında verilmiş şikayət üzrə məhkəmə prosesi davam edir.

Oktyabrın 1-də Binəqədi Rayon Məhkəməsində, hakim Vüsal Tağıyevin sədrliyi ilə keçirilən iclasda ekspertiza rəyi elan edilib.

Rəyə əsasən, İ. Axundovun müsahibələrində xüsusi ittihamçı, “Proqress 2016” MTK-nın rəhbəri Emil Səməndərovun ünvanına şərəf və ləyaqəti alçaldan ifadələrə yer verildiyi bildirilib. Bununla belə, rəsmi rəydə “nalayiq ifadələrə rast gəlinmədiyi” vurğulanıb.

Müdafiə tərəfi – vəkillər Ülvi Nəsibli və Şahbaz Kərimli – rəylə razılaşmayaraq, onun ziddiyyətli olduğunu bildiriblər. Onlar ekspertin “maraqlı şəxs” olduğunu əsas gətirərək işin AMEA-nın Dilçilik İnstitutuna linqvistik ekspertizaya göndərilməsi barədə vəsatət qaldırıblar.

Xüsusi ittihamçının vəkili Asim Abbasov isə bu vəsatətin təmin olunmamasını istəyib. Lakin məhkəmə müdafiə tərəfinin vəsatətini qəbul edib.

Bundan sonra A. Abbasov əlavə vəsatət verərək, ekspertiza rəyi verən Ədliyyə Nazirliyinin Məhkəmə Ekspertiza Mərkəzinin eksperti Almaz Bayramovanın məhkəməyə çağırılmasını və hər iki ekspertin dindirilməsini tələb edib. Məhkəmə bu vəsatətə baxılmasını təxirə salıb.

Növbəti məhkəmə iclası oktyabrın 16-da keçiriləcək.

Qeyd edək ki, İsfəndiyar Axundov barəsində Cinayət Məcəlləsinin 147.2-ci (böhtan) və 148-ci (təhqir) maddələri üzrə Emil Səməndərov tərəfindən xüsusi ittiham qaydasında şikayət verilib. İttihama görə, İ. Axundov müsahibələrindən birində E. Səməndərovu “dələduz” kimi təqdim edib.