ABŞ Prezidenti Donald Tramp Ağ Evə qayıtdıqdan sonra ilk dəfə olaraq Rusiyaya qarşı sanksiyalar tətbiq edib. Yeni məhdudiyyətlər Rusiyanın ən böyük enerji nəhəngləri – “Rosneft” və “Lukoil” şirkətlərini, eləcə də onların törəmə müəssisələrini əhatə edir.

ABŞ Maliyyə Nazirliyinin bəyanatında bildirilir ki, bu addım Kremlə iqtisadi təzyiqi artırmaq, Rusiyanın enerji gəlirlərini azaltmaq və onun hərbi maşınının maliyyələşməsini məhdudlaşdırmaq məqsədi daşıyır.

Maliyyə naziri Skott Bessent açıqlamasında deyib:

“İndi qətlləri dayandırmaq və dərhal atəşkəs elan etmək vaxtıdır. Prezident Putinin bu mənasız müharibəyə son qoymaqdan imtina etdiyini nəzərə alaraq, Maliyyə Nazirliyi Kremlin hərbi maşınını maliyyələşdirən Rusiyanın iki ən iri neft şirkətinə sanksiya tətbiq edir.”

Nazir əlavə edib ki, ABŞ administrasiyası və Prezident Tramp müharibənin dayandırılması istiqamətində səylərini davam etdirir və müttəfiq ölkələri də bu sanksiyalara qoşulmağa çağırır.

Maliyyə Nazirliyinin açıqlamasına əsasən, sanksiyalar “Rosneft” və “Lukoil”un Rusiyada fəaliyyət göstərən onlarla törəmə müəssisəsini də əhatə edir. Sanksiya siyahısına “Bashneft Dobycha”, “Vankorneft”, “RN Tuapse Oil Refinery”, “Lukoil Perm”, “Lukoil Kaliningradmorneft” və digər enerji hasilatı və emalı şirkətləri daxil edilib.

Bundan bir neçə saat sonra isə Avropa İttifaqı Rusiyaya qarşı on doqquzuncu sanksiya paketini qəbul edib.

Yeni sanksiyalar paketi Qərbin Moskva üzərində təzyiqləri artırmaq istiqamətində növbəti addım kimi qiymətləndirilir.