Avropa Şurası Parlament Assambleyası Gürcüstanda “demokratiyanın davam edən tənəzzülü” ilə bağlı ciddi narahatlıq ifadə edib.

Strasburq, 24 iyun 2026 – Avropa Şurası Parlament Assambleyası Gürcüstan hakimiyyətinin Avropa Şurası qarşısında götürdüyü öhdəliklərə və təşkilatın standartlarına əməl etmək iradəsi ilə bağlı “ciddi şübhələr” olduğunu bildirib.

AŞPA-nın Strasburqda keçirilən yay sessiyasında Edite Estrela və Sabina Ćudić tərəfindən hazırlanmış monitorinq hesabatı müzakirə olunub. Hesabat əsasında qəbul edilən qətnamədə Gürcüstanda demokratik geriləmənin dayanmadan davam etdiyi, vətəndaş cəmiyyətinə, siyasi müxalifətə və fərqli fikrə qarşı təzyiqlərin gücləndiyi vurğulanıb.

Assambleya qeyd edib ki, 2025-ci ilin oktyabrında qəbul edilmiş son qətnamədə Gürcüstan hakimiyyətinə ünvanlanan təcili tövsiyələrin heç biri yerinə yetirilməyib. Parlamentarilər hesab edirlər ki, hazırkı şəraitdə ölkədə həqiqətən demokratik seçkilərin keçirilməsi üçün zəruri şərtlər mövcud deyil.

Qətnamədə Gürcüstanda “praktiki olaraq bütün demokratik müxalifət partiyalarının qadağan edilməsi” və onların rəhbərlərinə qarşı cinayət təqiblərinin aparılması qəbuledilməz adlandırılıb. AŞPA xəbərdarlıq edib ki, bu proses davam edərsə, Gürcüstanda faktiki olaraq təkpartiyalı diktatura qurula bilər. Assambleyanın fikrincə, belə bir vəziyyət Avropa Şurasına üzvlüklə bir araya sığmır.

Bununla belə, AŞPA Gürcüstan hakimiyyəti ilə açıq və nəticəyönümlü dialoqa sadiq qaldığını bildirib. Eyni zamanda vurğulanıb ki, Avropa Şurasının standartları və üzvlük öhdəlikləri müzakirə predmeti ola bilməz və onlardan geri çəkilmək mümkün deyil.

Assambleya Avropa Şurasının müvafiq qurumlarını Gürcüstanın təşkilat qarşısındakı öhdəliklərinə tam əməl etməsini təmin etmək üçün bütün mövcud mexanizmlərdən, o cümlədən İnsan Hüquqları üzrə Avropa Konvensiyasının 52-ci maddəsi çərçivəsində imkanlardan istifadə etməyə çağırıb. AŞPA həmçinin Avropa Şurasına üzv dövlətləri Gürcüstanla bağlı Strasburq Məhkəməsinə dövlətlərarası şikayətlərin verilməsi imkanını nəzərdən keçirməyə səsləyib.

Qeyd edək ki, Gürcüstan hazırda Avropa Şurası Parlament Assambleyasının tam monitorinq proseduru altında olan on üzv dövlətdən biridir. Bu prosedur çərçivəsində ölkələrin Avropa Şurası qarşısında götürdüyü öhdəlik və vədlərə nə dərəcədə əməl etdiyi müntəzəm müzakirələr və səfərlər vasitəsilə qiymətləndirilir.