İran prezidenti Məsud Pezeşkian ölkənin paytaxtını Tehrandan ölkənin cənubuna köçürmək niyyətində olduğunu bildirib.

O, bu barədə oktyabrın 2-də İran körfəzi sahilində yerləşən Hormozqan vilayətinə səfəri zamanı danışıb.

Prezidentin sözlərinə görə, Tehran şəhərinin həddindən artıq böyüməsi, su çatışmazlığı və torpaq çökməsi təhlükəsinin artması paytaxtın köçürülməsini zəruri edir:

“Tehran artıq çox böyüyüb, kifayət qədər su təchizatı yoxdur və torpaq çökməsi riski artır. Buna görə də ölkənin paytaxtını cənuba köçürməkdən başqa çıxış yolu görmürəm.”

Pezeşkian əlavə edib ki, bu təklifi ötən il ali lider Ayətullah Əli Xameneiyə təqdim edib. O, məsələnin cəmiyyətdə çoxlu tənqidlərə səbəb olduğunu, lakin resurs böhranının dərinləşdiyini vurğulayıb.

Prezident Hormozqan bölgəsinin strateji və iqtisadi potensialına diqqət çəkib:

“Hormozqan Fars körfəzi sahilində yerləşir, açıq dənizə birbaşa çıxışı var və bu, ticarət və iqtisadi əlaqələrin inkişafı üçün geniş imkanlar yaradır. Əgər bu bölgəyə fərqli baxışla yanaşsaq, onu firavan və inkişaf etmiş bir mərkəzə çevirə bilərik.”

Pezeşkian bildirib ki, Tehran, Kərəc və Qəzvin hazırda ciddi su böhranı ilə üz-üzədir və bu problemi “asanlıqla həll etmək mümkün deyil”.

Hazırda Tehranda 10 milyondan çox insan yaşayır və şəhər İranın su ehtiyatlarının təxminən dörddə birini istehlak edir. Paytaxtın su təchizatının 70%-i bəndlərdən, 30%-i isə yeraltı mənbələrdən qarşılanır. Lakin az yağıntı və artan buxarlanma səbəbindən bəndlərdəki su azalır, yeraltı sulara isə təzyiq artır.