Elmi-Tədqiqat Tibbi Bərpa İnstitutunun sabiq böyük elmi işçisi, nevroloq Mərziyyə Məmmədova rəhbərliyin onun adına saxta şəkildə vəzifə və əməkhaqqı rəsmiləşdirib, pul silindiyini iddia edir. Bu barədə o, “Toplum TV”-yə açıqlamasında bildirib.

“Adımdan ştat və əməkhaqqı yazılıb, xəbərim olmayıb”

Məmmədova 2004-cü ildən institutda çalışdığını, 2022-ci ildən isə böyük elmi işçi vəzifəsini daşıdığını deyir. Onun sözlərinə görə, problemlər 2022-ci ilin sonlarında rəhbərlik dəyişəndən sonra başlayıb.

Həkim iddia edir ki, 2024-cü ildə tibbi kadrların vahid reyestrinə baxarkən, 2021-ci ildə xitam verilmiş əmək münasibətlərinin hələ də sistemdə aktiv olduğunu görüb:

“Məsələni aidiyyəti şəxsə deyəndə tələsik ‘mən düzəldərəm’ cavabı verdi. Sonradan məlum oldu ki, guya mənim adımdan işdən çıxma ərizəsi yazılıb və maaşımın dayandırılması rəsmiləşdirilib. Əmr isə kağız üzərində olub, sistemə ümumiyyətlə düşməyib”.

O əlavə edir ki, rəhbərlik əmək müqaviləsini yeniləmədən onu əlavə funksiyalarla yükləyib, lakin köhnə əməkhaqqı ilə işlədib.

“Vakan­siyalar satılır, elmi fəaliyyətə məhdudiyyət qoyulur” – prezidentə müraciət

Həkim bildirir ki, institutdakı yeyinti və qayda pozuntuları ilə bağlı o və bir qrup elmi işçi bu ilin fevralında prezident İlham Əliyevə müraciət ediblər. Müraciətdə direktor Mətanət Əfəndiyevanın dövründə:
• boş vakansiyaların satıldığı,
• elmi fəaliyyətə süni məhdudiyyətlər qoyulduğu,
• maliyyə pozuntularına yol verildiyi,
• işçilərə təzyiq və alçaltma halları olduğu

iddia edilib.

Məmmədovanın sözlərinə görə, bu müraciətdən sonra ona qarşı təzyiqlər daha da artıb.

Töhmətlər, təqdimatlar və işdən çıxarılma

Həkim deyir ki, şöbə müdiri ona rəhbərlikdən məktub gəldiyini bildirərək, iş şəraitinin dəyişdirilməsi və ya yarımştata keçirilməsi, razılaşmadığı halda isə 68-ci maddə ilə işdən çıxarılma ilə hədələyib.

Buna qədər isə onun haqqında “işdə olmadığı” ilə bağlı təqdimatlar yazıldığı, aprel və may aylarında töhmət verildiyi qeyd olunur. Nəhayət, iyul ayında Məmmədova işdən çıxarılıb.

Məhkəmələr və qurumların reaksiyası

Məmmədova bildirib ki, şikayətləri ilə bağlı dövlət qurumları əsasən müraciətləri yenidən Səhiyyə Nazirliyinə göndərməklə kifayətlənib:

“Nazirin qəbulunda deyirlər ki, işiniz məhkəmədədir, biz qarışmırıq. Mən isə başqa qanunsuzluqları deməyə gəlmişəm. Sertifikatsız həkimlərlə bağlı dəfələrlə şikayət etmişəm, tədbir görən yoxdur”.

Bakı İnzibati Məhkəməsi onun işdən çıxarılması ilə bağlı Əmək Müfəttişliyinin təqdimatı əsasında institut və direktor Mətanət Əfəndiyevanı 2000 manat cərimələyib.

Nərimanov Rayon Məhkəməsi isə 26 noyabrda Məmmədovanın işə bərpa iddiasını təmin etməyib. O bildirir ki, qərar tələsik elan olunub və hələ də elektron sistemə yerləşdirilməyib.

Məmmədovanın iddiasına görə, apellyasiya şikayəti təqdirdə onu ikinci iş yerindən – Həkimləri Təkmilləşdirmə İnstitutundan da çıxarmaqla hədələyirlər.

“Stres səhhətimə ciddi ziyan vurub”

Həkim əlavə edir ki, institutdakı təzyiq və gərginlik onun sağlamlığına zərər vurub, günlərlə işə çıxa bilməyib. O, həmçinin rəhbərlik barəsində Cinayət Məcəlləsinin bir neçə maddəsi, o cümlədən “sağlamlığa yüngül ziyan vurma” ilə bağlı Baş Prokurorluğa müraciət etsə də, ərizə yenidən Səhiyyə Nazirliyinə göndərilib.

İnstitutun mövqeyi

Elmi-Tədqiqat Tibbi Bərpa İnstitutunu məhkəmədə təmsil edən vəkil Rəcəb Nurəliyev iddiaları “əsassız” adlandırıb, lakin geniş açıqlama verməyib. Direktor Mətanət Əfəndiyeva ilə əlaqə saxlamaq mümkün olmayıb.