Bölgədə yaranmış mövcud vəziyyətlə əlaqədar Azərbaycan dövləti xaricdə yaşayan vətəndaşların təhlükəsizliyi istiqamətində tədbirləri gücləndirib.

Bu barədə məlumatı Diasporla İş üzrə Dövlət Komitəsi yayıb. Bildirilib ki, Komitə ölkəmizin xaricdəki diplomatik nümayəndəlikləri ilə sıx və koordinasiyalı əməkdaşlıq çərçivəsində hərəkət edərək zəruri addımlar atır və fəaliyyətini gücləndirib.

Açıqlamada qeyd olunub ki, Komitə əməkdaşları və Ərəb Ölkələrində Yaşayan Azərbaycanlıların Koordinasiya Şurasının koordinatorları müxtəlif ölkələrdəki icma üzvləri ilə intensiv əlaqə saxlayır. Soydaşlarımıza ehtiyatlı olmaq, təhlükəsizliklə bağlı bütün rəsmi çağırış və tələblərə əməl etmək tövsiyə olunur.

Məlumata görə, informasiya mübadiləsinin operativliyi və müraciətlərə çevik reaksiya verilməsi məqsədilə Komitənin “140” Çağrı Mərkəzi 24 saat fasiləsiz fəaliyyət göstərir. Xaricdə yaşayan azərbaycanlılar fövqəladə vəziyyət, hüquqi və ya humanitar xarakterli çətinliklərlə qarşılaşdıqları halda dərhal Çağrı Mərkəzinə müraciət edə bilərlər. Daxil olan müraciətlərin operativ qeydə alındığı və aidiyyəti qurumlarla koordinasiyalı şəkildə araşdırıldığı bildirilib.

Komitə həmçinin diaspor təşkilatları vasitəsilə maarifləndirmə işlərini daha da gücləndirib. Məqsəd xaricdə yaşayan hər bir azərbaycanlının təhlükəsizliyini təmin etmək, hüquq və maraqlarını qorumaq, zərurət yarandığı halda dəstək mexanizmlərini operativ şəkildə işə salmaq və təxirəsalınmaz tədbirlər həyata keçirməkdir.