ABŞ və İran arasında müzakirə olunan yeni razılaşmanın əsas şərtləri açıqlanıb.

“Axios” portalının məlumatına görə, tərəflər arasında əldə olunması gözlənilən saziş atəşkəsin ilkin olaraq 60 gün müddətinə uzadılmasını nəzərdə tutur. Bu müddət ərzində bir sıra mühüm addımların atılması planlaşdırılır.

Bildirilib ki, razılaşmaya əsasən, Hörmüz boğazı yenidən açılacaq və İran gəmilərin təhlükəsiz keçidini təmin etmək üçün ərazidə yerləşdirilmiş minaları təmizləyəcək. Bunun qarşılığında ABŞ İran limanlarına tətbiq olunan blokadanı aradan qaldıracaq və neft satışına müəyyən sanksiya güzəştləri tətbiq edəcək.

Sənəd layihəsinə görə, tərəflər 60 günlük qarşılıqlı anlaşma memorandumu imzalayacaq və bu müddət razılıq əsasında uzadıla bilər. Həmçinin, İranın nüvə proqramının məhdudlaşdırılması ilə bağlı danışıqların aparılması, uranın zənginləşdirilməsinin dayandırılması və yüksək zənginləşdirilmiş ehtiyatlardan imtina məsələləri də gündəmdədir.

Razılaşma çərçivəsində İranın nüvə silahı hazırlamamaq öhdəliyi də yer alır. Eyni zamanda, ABŞ qoşunlarının regionda qalacağı, yekun saziş əldə olunacağı təqdirdə isə çıxarılacağı bildirilir.

Məlumatda həmçinin Hizbullah ilə bağlı münaqişənin dayandırılması məsələsinin də sənəddə əks olunduğu qeyd olunur.

Qeyd edək ki, bu təfərrüatlar hələlik rəsmi olaraq İran tərəfindən təsdiqlənməyib. Bununla belə, tərəflərin razılaşmaya yaxın olduğu bildirilir.