ANS-in qurucusu, jurnalist Vahid Mustafayev Azərbaycanda uşaq pulu məsələsi ilə bağlı fikirlərini bölüşərək, bu mövzuya yalnız büdcə yükü kimi yanaşılmasının doğru olmadığını bildirib.

Onun sözlərinə görə, Azərbaycanda 14 yaşına çatmamış 2 milyondan çox uşaq yaşayır. Əgər dövlət hər uşağa aylıq 100 manat müavinət ödəsə, bu, büdcəyə ayda təxminən 200 milyon manat, ildə isə 2,5 milyard manatdan artıq vəsaitə başa gələr.

V.Mustafayev qeyd edib ki, hökumət bu sahədə korrupsiya riskləri, saxta müavinət halları, əmək bazarında passivliyin artması və dövlətin uzunmüddətli maliyyə öhdəlikləri ilə bağlı narahatlıqlar daşıyır. Onun fikrincə, bu arqumentlərin müəyyən iqtisadi əsası olsa da, məsələnin digər tərəfi də nəzərə alınmalıdır.

Jurnalist hesab edir ki, Azərbaycanda illərdir yalnız “uşaq pulunun verilməsi nə qədər xərc tələb edir?” sualı səsləndirilir, lakin “uşaq pulunun verilməməsinin qiyməti nə qədərdir?” sualı diqqətdən kənarda qalır.

O bildirib ki, uşaqlı ailələrə dəstəyin olmaması bir sıra sosial və demoqrafik problemlərə səbəb ola bilər:

* Doğum səviyyəsinin azalması və demoqrafik geriləmə;
* Ailələrin sosial rifahının zəifləməsi;
* Kölgə iqtisadiyyatının genişlənməsi;
* Gənclərin xaricə miqrasiyasının artması;
* Əhalinin sürətlə qocalması.

Vahid Mustafayev vurğulayıb ki, bir çox inkişaf etmiş ölkələrdə – Almaniya, İsveç, Norveç, Fransa, Yaponiya və Cənubi Koreya kimi ölkələrdə uşaqlı ailələrə dövlət dəstəyi göstərilir. Bunun səbəbi isə uşaqlara sadəcə sosial xərc kimi deyil, gələcəyin vergi ödəyicisi, mütəxəssisi və ölkənin inkişafına töhfə verəcək insan kapitalı kimi yanaşılmasıdır.

O, həmçinin alternativ dəstək mexanizmlərinin tətbiqini təklif edib. Təkliflər arasında uşaqlı ailələrin gəlir vergisinin müəyyən hissəsindən azad edilməsi və işsiz valideynlərə minimum əməkhaqqının müəyyən hissəsi həcmində müvəqqəti dəstəyin göstərilməsi yer alır.

“Dövlətin ən böyük sərvəti neft deyil — o tükənir. Qızıl deyil — o satılır. Şirkətlər deyil — onlar müflisləşə bilir. Siyasi ittifaqlar deyil — onlar dəyişir. Dövlətin ən böyük sərvəti insandır. İnsanın ən böyük davamı isə uşaqlardır”, – deyə Vahid Mustafayev qeyd edib.