“Meydan TV işi” üzrə həbsdə olan jurnalist, “Arqument.az” saytının baş redaktoru Şəmşad Ağa Penitensiar Xidmətin Müalicə Müəssisəsindən məktub yazıb. O, müəssisədəki şərait və münasibətləri təsvir edərək həm məhkəmə, həm də tibbi sistemdəki problemlərə diqqət çəkib.

Jurnalist bildirib ki, səhhətində uzun müddətdir davam edən problemlər səbəbilə sentyabrın 13-də Müalicə Müəssisəsinə köçürülüb. Onun sözlərinə görə, müayinə və müalicə prosesi formal xarakter daşıyır, şərait isə antisanitariya içindədir:
“14 nəfərlik otaqlarda xəstələrdən bəziləri yerdə yatırdı. Bura xəstəxanadan çox, Sovet dövrünün islah əmək düşərgələrini xatırladırdı”.

Şəmşad Ağa yazır ki, müəssisədə tibbi xidmət yox səviyyəsindədir:
– yalnız bir USM həkimi onlarla təcridxana və cəzaçəkmə müəssisəsinə baxır,
– rentgen həkimi işə gəlmədiyindən xəstələr günlərlə gözləməli olur,
– MRT, endoskopiya və kolonoskopiya kimi prosedurlar müəssisədə mövcud deyil.

“Bütün bunlar üçün məhbus ailələri özəl klinikalara ödəniş edir, göndəriş alır və növbəyə dayanır. Paytaxtda yerləşən bu müəssisədə tibbi cihazların olmaması sual doğurur: milyonlarla vəsait hara xərclənib?”, – deyə jurnalist sual edir.

O, həmçinin rüşvət və ayrı-seçkilik halları ilə üzləşdiyini yazır:
“Şöbə və palatalar ‘burjuy’ və ‘kasıb’ olaraq bölünür, yerlər pulla satılır. Ən kasıb hesab edilən qəbul şöbəsində belə, köhnə çarpayılar bir həftəlik 20 manata verilir”.

Şəmşad Ağa Müalicə Müəssisəsinin rəhbərliyinin xəstələrlə münasibətini də tənqid edib. Onun sözlərinə görə, baş həkim xəstələrlə soyuq davranır, müəssisədə isə tibbi xidmətə deyil, pul qazanmağa üstünlük verilir.

“Bir həftə ərzində keçdiyim müayinələrin nəticələrini mənə demədilər. Mən buradan Kürdəxanıya heç bir tibbi yardım edilmədən ‘etap’ olunacağam. Burada ən dəyərli şey pul, ən ucuz şey isə insan həyatıdır”, – deyə o məktubunu tamamlayıb.

Şəmşad Ağa 2024-cü ildə “Meydan TV işi” çərçivəsində həbs olunub. O, özünü təqsirli bilmir və beynəlxalq təşkilatlar tərəfindən siyasi məhbus kimi tanınır.