Ermənistanda parlament seçkilərində ikinci yeri tutan “Güclü Ermənistan” bloku səsvermə prosesi zamanı çoxsaylı pozuntular qeydə alındığını bildirərək nəticələrin yenidən araşdırılmasını tələb edib.

Blokun deputatlığa namizədi, hüquqşünas Qoar Meloyan keçirdiyi mətbuat konfransında bildirib ki, seçki dövründə yaradılmış “qaynar xətt”ə minlərlə müraciət daxil olub və hazırda həmin məlumatlar yoxlanılır.

Onun sözlərinə görə, daxil olan şikayətlərin bir hissəsi inzibati resurslardan istifadəyə aiddir. Meloyan iddia edib ki, bəzi dövlət qulluqçularına hakimiyyətin lehinə səs vermələri üçün təzyiq göstərilib, onlardan bülletenləri fotoşəkil çəkmələri və ya müəyyən siyasi qüvvəyə səs vermədiklərini sübut etmələri tələb olunub.

Blok həmçinin seçici siyahıları ilə bağlı problemlər aşkar etdiyini bildirib. Məlumata görə, 846 ünvanda 20-dən çox şəxsin qeydiyyatda olduğu müəyyən edilib, bəzi hallarda isə bir ünvanda yüzlərlə vətəndaşın qeydiyyatda olduğu qeyd olunub.

Meloyan seçkilər zamanı tərəfdarlarına qarşı saxlanılma və həbslərin həyata keçirildiyini də vurğulayıb. Onun sözlərinə görə, yaşlı şəxslər də daxil olmaqla bir sıra vətəndaşlar təzyiq məqsədilə polisə aparılıb.

“Güclü Ermənistan” bloku Yerevanda bütün səslərin yenidən sayılmasını vacib hesab edir. Blok nümayəndəsi bəzi seçki məntəqələrində aparılan təkrar sayımlar zamanı nəticələrdə ciddi fərqlər aşkar olunduğunu iddia edib.

Qeyd edək ki, Ermənistan Mərkəzi Seçki Komissiyasının ilkin məlumatına əsasən, hakim “Vətəndaş Müqaviləsi” Partiyası 49,82 faiz, “Güclü Ermənistan” bloku 23,28 faiz, “Ermənistan” bloku isə 9,93 faiz səs toplayıb. Seçkilərin yekun nəticələrinin iyunun 14-də açıqlanacağı gözlənilir.