Ermənistanda 7 iyun tarixində keçirilən parlament seçkilərindən sonra səslərin yenidən sayılması aparılıb. Məlumata görə, seçki nəticələrinin yenidən yoxlanılması “Güclü Ermənistan” müxalif blokunun müraciətindən sonra həyata keçirilib.

Ermənistan Mərkəzi Seçki Komissiyası ümumilikdə 2005 seçki məntəqəsindən 637-də səsləri təkrar hesablayıb. Rəsmi açıqlamaya əsasən, yenidən sayım nəticəsində bəzi siyasi qüvvələrin topladığı səslərdə kiçik dəyişikliklər qeydə alınıb.

Məlum olub ki, Rusiya yönlü “Güclü Ermənistan” blokunun səsləri 508 səs artaraq 340 088-ə çatıb. “Çiçəklənən Ermənistan” partiyasının səsləri 147 artaraq 58 378 olub. Hakim “Mülki müqavilə” partiyasının səsləri isə 1148 artaraq 727 820-yə yüksəlib. Robert Koçaryanın rəhbərlik etdiyi “Ermənistan” bloku isə 217 səs əlavə qazanaraq 145 113 səs əldə edib.

Komissiya həmçinin bildirib ki, ümumi uyğunsuzluqların sayı 230 artıb, etibarsız bülletenlərin sayı isə 859 azalıb. 12 iyun tarixində üç seçki məntəqəsinin nəticələri ləğv edilib. Son nəticələrin 14 iyunda açıqlanacağı gözlənilir.

Seçkilərdə əsas nəticəyə görə, Baş nazir Nikol Paşinyanın rəhbərlik etdiyi “Mülki müqavilə” partiyası təxminən 50 faiz səslə qalib gəlib. Müxalif “Güclü Ermənistan” bloku 23,29 faiz, “Ermənistan” bloku 9,94 faiz, “Çiçəklənən Ermənistan” isə təxminən 4 faiz səs toplayıb.

Seçkilərlə bağlı həm hakimiyyət, həm də müxalifət tərəfindən müxtəlif iddialar və pozuntular barədə açıqlamalar verilib, hüquq-mühafizə orqanları isə bir sıra faktlar üzrə araşdırma aparıldığını bildirir.