Sloveniya hökuməti sentyabrın 25-də İsrailin baş naziri Benyamin Netanyahuya səyahət qadağası tətbiq edib. Bununla da Sloveniya bu addımı atan ilk Avropa İttifaqı ölkəsi olub.

Xatırladaq ki, avqust ayında Sloveniya İsrailə silah satışını dayandıran ilk Aİ ölkəsi olmuşdu. Bundan əvvəl isə hökumət israilli nazirlər İtamar Ben Qvir və Becalel Smotriçə fələstinlilərə qarşı soyqırımına çağırış ittihamı ilə sanksiya tətbiq etmişdi.

Sloveniya 2024-cü ilin iyununda Fələstin dövlətini tanıyıb və hökumət üzvləri ardıcıl olaraq İsrailin Qəzzada apardığı müharibəni sərt şəkildə tənqid ediblər. Prezident Nataşa Pirk Musar müharibəni açıq şəkildə “soyqırımı” adlandırıb. Sentyabrın 23-də BMT Baş Assambleyasında çıxışı zamanı Musar belə deyib:

“Biz doğru olanı etməliyik. Holokostu dayandırmadıq, Ruandadakı soyqırımı dayandırmadıq, Srebrenitsadakı soyqırımı da dayandırmadıq. Qəzzadakı soyqırımı dayandırmalıyıq. Artıq heç bir bəhanə yoxdur.”

Hazırda Benyamin Netanyahu barədə Beynəlxalq Cinayət Məhkəməsinin müharibə cinayətləri ittihamı ilə həbs orderi mövcuddur.

Sentyabrın 25-də o, BMT Baş Assambleyasında çıxış etmək üçün ABŞ-a yollanıb. Uçuş monitorinqi saytları Netanyahunun təyyarəsinin Avropa ölkələrinin hava məkanından yan keçərək Aralıq dənizi üzərindən uçduğunu qeydə alıblar.