Həbsdə olan fəal Ayxan İsrafilov saxlanıldığı müəssisədə son aylarda sosial izolyasiyaya məruz qaldığını bildirib.

**İşçi Masası Həmkarlar İttifaqları Konfederasiyası**nın üzvü olan İsrafilovun sözlərinə görə, o, hazırda **10 saylı Cəzaçəkmə Müəssisəsi**ndə saxlanılır və barakda digər məhkumlarla ünsiyyətinin kəsilməsi üçün təzyiq göstərilir.

Onun iddiasına görə, barakda qeyri-rəsmi “başçı” kimi tanınan şəxs digər məhkumlara onunla danışmağı qadağan edib. İsrafilov deyir ki, bu vəziyyət barakda işıqların bərpası ilə bağlı etdiyi şikayətdən sonra yaranıb və həmin vaxtdan ona qarşı aqressiya artıb.

“Barakdakı dustaqlara bir-bir yaxınlaşıb mənimlə ünsiyyəti kəsməyi əmr edir. Sosial izolyasiya yaratmaq istəyir”, – deyə o bildirib.

Fəalın sözlərinə görə, müəssisənin 6-cı dəstəsinin yataqxanasında son 1–2 ayda vəziyyət daha da ağırlaşıb və məhkumlara təzyiq göstərilir.

“Qol gücünə, təhdidlər altında insanların iradəsi sındırılır. Burada əsl diktatura formalaşıb”, – deyə İsrafilov qeyd edib.

O həmçinin bildirib ki, müəssisədə nəzarət etməli şəxslər baş verənlərə ya göz yumur, ya da məlumatlar yuxarı instansiyalara təhrif olunmuş şəkildə çatdırılır. Onun sözlərinə görə, mövcud şəraitdə şikayət etmək də faktiki mümkün deyil.

İsrafilov saxlanma şəraitinin də qənaətbəxş olmadığını deyib. Bildirib ki, səhər saat 10:00-dan sonra barakda işıqlar söndürülür və jalüzlər bağlanır, bu isə oxumağa və ya digər fəaliyyətlə məşğul olmağa imkan vermir.

Fəal psixoloji mühitin də ağır olduğunu vurğulayıb: “Burada özümü 30-cu illərin SSRİ-sindəki kimi hiss edirəm. Hamının gözündə qorxu var”.

Onun sözlərinə görə, azı üç nəfər psixoloji təzyiqə dözməyərək başqa yerə köçürülüb, digərləri isə yer çatışmazlığı səbəbindən qalmağa məcburdur.

İsrafilov müraciətinin şikayət deyil, xəbərdarlıq xarakteri daşıdığını deyərək Penitensiar Xidmət rəhbərliyini vəziyyətə müdaxilə etməyə çağırıb.

Onun dedikləri ilə bağlı aidiyyəti qurumlardan açıqlama almaq mümkün olmayıb.

Qeyd edək ki, Ayxan İsrafilov 2023-cü ilin avqustunda həbs olunub. Bakı Ağır Cinayətlər Məhkəməsi onu narkotik maddələrin əldə edilməsi və daşınması ittihamı ilə 3 il azadlıqdan məhrum edib. İsrafilov isə özünü təqsirli saymır və həbsinin siyasi fəaliyyətinə görə sifarişli olduğunu bildirir.